Iternga tikillugu: Jens-Erik Kirkegaard Siumup politikkia pillugu

Sermitsiaq.AG-mik atuisartut folketingimut qinigassanngortittunut apeqquterpassuaqarsimapput, aaqqissuisoqarfiullu pitsaanerpaat immikkut toqqarsimavai.

Qinigassanngortittut akissutaat politikkiallu saqqummiunneqartassapput akissutaat tiguneqaraangata. Akissutaat aaqqissuisoqarfimmit naalisagaallutillu aaqqissuunneqarsimapput, takissutigisinnaasaat qaangersimagaangassuk.

Ministeriunertut kina tikkuarniarpiuk? (1. Aqqa / 2. Taanna akerusunngilara)

– Siumut partiiuvoq nammaqatigiissoq, taamaattumillu Helle Thorning-Schmidt toqqassavarput.

Namminersorluni oqartussaanermik isumaqatigiissut Danmarkimik isumaqatigiinniutigeqqinniarpiuk, tamatumunnga periarfissaqassaguit? (Aap naaggaluunniit)

– Tamanna qineqqusaarutiginngilara.

Danmark sorsunnerni iluatsinngitsuni arlalinni peqataasarsimavoq. Naalagaaffeqatigiit illersornissamut politikkiannut Kalaallit Nunaat sunniuteqarneruniartariaqarpa, sorsunnernut ameranernut qallunaat peqataaratarsinnaanerat unitsinniarlugu? (Aap naaggaluunniit)

– Kalaallit Nunaat oqaaseqartassaaq suliassanut Kalaallit Nunaannut tunngasunut, assersuutigalugu Pituffimmut tunngasunut. Sorsunnerit Danmarkip akisussaaffigissavai.

Qanoq isillutit kalaallit ilinniarsimasorpassuit Danmarkimit nunatsinnut utertinniassavigit?

– Oqaloqatigiinnikkut attaveqartarnikkullu, aammattaarli Kalaallit Nunaanni aningaasarsornikkut siuariartorneq atorfinnik pissanganartunik amerlanerusunik, periarfissanillu allanik aqqutissiuussisinnaavoq.

Danmarkimi kalaallinut pitsanngorsagassaqarpa, isumaqarfigisannik immikkut suliniutigissallugit pingaarutilinnik?

Arlalinnik unammilligassaqarpoq ilaatigut akulerutsitsineq, kalaaliminernik eqqussinissamut periarfissat pitsaanerusut, aammattaarli isummiutiinnakkat akiorneqarnissaat.

Isumaqarpit naalagaaffeqatigiinni killeqarfitsigut aporfissat peerneqassasut (aap naallagaluunniit), aappeeruit suna piissallugu ilinnut pingaarnersaava?

– Ilaqutariinni toqqissisimasuni aningaasaqarniarneq pingaaruteqarpoq, taamaattumillu Kalaallit Nunaata Danmarkillu akornanni ilaatigut inuussutissarsiutitigut suliniutinut aammalu pisortat-namminersortut peqatigiillutik ingerlataannut aningaasaliissuteqarnissaq ajornannginnerulertariaqarpoq.

Naalagaaffeqatigiinneq ineriartortinniarpisiuk? (Aap naaggaluunniit) (Qanoq isillusi?)

– Qularutissaanngilaq namminersulivinnissamut ingerlasugut. Naalagaaffeqatigiinnerulli atuunnerani suliniutigisariaqarput kikkunnut tamamnut toqqissisimanartuunissaq aammalu Kalaallit Nunaata Danmarkillu suleqatigiinnissaat.

Folketingimut qinigaassagaluaruit Inatsisartunit sulinngiffeqarallarniarpit? (Aap naaggaluunniit), marlunnillu ilaasortaaffeqarneq qanoq isumaqarfigaajuk?

– Folketingimut qinigaassaguma qinigaaffikka marluk attatiinnarniarpakka. Tamanna Inatsisartut Folketingillu akornanni qanittumik suleqatigiissitsisinnaavoq, Kalaallit Nunaannut pitsaanerusumik angusaqarfiusinnaalluni (akissut aaqqissuisoqarfimmit naalisagaq).

Isumaqarpit Aleqa Hammondip folketingimut qinigassanngortinnera akuerineqarsinnaasoq? (Aap naaggaluunniit)

(Qinigassanngortittut apeqqut taanna akinngilaa).