Tele-Post
IT-mut atortut nutaat Tele-Postimut ajornartorsiortitsisut
Atortut atuisunik sullissinermut nutaat ukiut marluk ingerlanerini atorunnaariartornissaat Tele-Postimit aalajangiunneqarpoq. Atortut ingerlatsinermut aningaasartuutit 2015-imi annertusitissimavai, taamaakkaluartoq Tele-Postip sinneqartoorutini annertusitippai
Tele-Post 2015-imi akileraannginnermi 75 millioner koruuninik sinneqartooruteqarpoq. Ingerlatsivik Namminersorlutik Oqartussanit pigineqartoq maajip 18-ni ataatsimeersuareernerup kingorna taama ilisimatitsivoq.
Taamaalilluni sinneqartoorut 2014-imut sanilliullugu annertuneruvoq, tassani Tele-Post akileraannginnermi 68,9 millioner koruuninik sinneqartooruteqarpoq.
Siulersuisut ukioq 2015 aningaasaqarnikkut allanngortoqarfiuallaanngitsoq, suliffeqarfimmili ineriartorneq uninngasutut taaneqarsinnaanngitsoq nalilerpaat.
Mobildata annertunerusoq
Assersuutigalugu Tele-Postip atuisunut mobilit atorlugit interneteqarneq pitsanngorsarpaa. Sukkanerulersillugu, akit appartillugit mobilisinermilu datat ilaareertartut marloriaatinngorlutik.
Taamatut iliuuseqarnerup nassataanik 2014-mut sanilliullugu 2015-mi mobilit atorlugit internetimik atuineq 112 procentimik qaffariarpoq, Tele-Post ilisimatitsivoq.
Atortut nutaat atorunnaarsinneqassasut
2015-mi kaaviiaartinneqarput 843,4 millioner koruunit, 2014-mit 50 millioner koruuninik qaffasinnerullutik.
Piffissami tassani ingerlatsinermut aningaasartuutit 728,3 millioner koruuniniit 779,7 millioner koruuninut qaffapput. Tamatumanilu atuisunut aqutsinermut atortumik nutaamik ineriartortitsinermut aningaasartuutit qaffariaammut ilaatigut peqqutaapput.
Tamakkiisumik iluatsinngitsut
- Atortut atuisunik sullissinermut pitsanngorsaatissat 2015-mi atulikkagut suli iluatsilluanngillat, taamaattumik ukiut tulliuttut marluk ingerlanerini atorunnaariartornissaat aalajangiunneqarpoq, siulersuisuni siulittaasoq Stine Bosse, tusagassiuutinut nalunaarummi nassuiaavoq.
Tele-Postilu atortut taakku siunissami qanoq pineqarnissaannik aalajangiinissamut maannakkut nalilersuivoq.
Siulersuisut ilaneqartut
Ataatsimeersuarnermi siulersuisut tamarmik qinigaaqqipput, siulersuisullu ataatsimik ilaneqarnissaat Naalakkersuisut aalajangerpaat.
Siulersuisut ataatsimeersuarnerup kingorna ima isikkoqarput, Stine Bosse (siulittaasoq) siulersuisunullu ilaasortat Ulrik Blidorf, Maliina Abelsen Kim Søgård Kristensen, Emil Kleemann, Pele Kleemann nutaatullu Malene Broberg.
Aprilimi siulersusisut immap naqqatigut kabilip aamma sakkortusaaviit ilaneqarnissaat aalajangiuppaat, ukiullu matuma naalernerani sulinermi periusissiaq nutaaq akuersissutigissavaat.
Suliniutit annertuut
- 2016-mi suliassat annertuut arlallit aallartissavagut, siunissamilu mobileqarnermik ingerlatsinerup ammaanneqarsinnaanera aamma sillimaffigisassaavoq. Taamaattumik periusissiamik allanngortitsinissaq pisariaqarpoq, suliffeqarfiup, suleriutsit tunisassiallu tamakkiisumik pisariakillisaaviginissaannut samminninneq annertooq pisariaqarmat, Kristian Reinert Daviden tusagassiuutinut nalunaarummi nassuiaavoq.
Allaaserisap ataani assit takukkit