aallartisaaneq
IT-mik ineriartortitsisut marluk aningaasatigut ikiorserneqartut
Grønlandsbankip Inuussutissarsiornermut Aningaasaaateqarfia aallartisaanernut mikinerusunut, aningaasarsiornikkut siuariartornermik suliffinnillu pilersitsisinnaasunut, aallartitsissutissanik 2 millioner koruuninik immikkoortitsivoq
Aallartisaasut ´aallartisaasunut taarsigassarsianik, aningaaserivimmi nalinginnaasumik taarsigassarsianit allaanerusunik´ taaneqartunik maanna Grønlandsbankimi taarsigassarsiniarsinnaanngorput. Nunatsinni aningaaseriviit annersaat siunertamut tamatumunnga 2 millioner koruuninik immikkoortitsisimavoq.
Maanna aningaaserivik tusagassiorfinnut nalunaarutikkut paasissutissiivoq IT-mik ineriartortitsisut marluk aaqqissuussakkut tassuuna taarsigassarsisinneqarsimasut.
USA-mi aallartisarluni
Taakkua tassaapput Kaaka Lundip Thank You-app-ia aamma Jens-Jakob Lennert Sandgreenip Balloon-imik suliniutaa.
– Nutaamik taarsigassarsinermigut Jens-Jakob Lennert Sandgreen USA-mi aallartisaanissaminut aningaasanik naammattunik katersisimavoq, aningaaserivik allappoq.
Periarfissamik pileritsisoq
Jens-Jakob Lennert Sandgreen oqarpoq sammisaqarfimmut app-mut aningaasaliiffigineqassagaanni tamatumunnga qinngaqqunnani uppernarsarneqaqqaartariaqartoq.
– Tassami sammisaqarfimmi tassani inuit isumassarsiatsialannut aningaasaliineq ajorput, taassumali ingerlanneqarneranut aningaasaliisoqartarluni. Taamaattumik taarsigassarsinitsigut suliniutip aallartisarnissaanut naammattunik aningaasassaqalerpugut, kingornalu piviusunngortinnissaanut periarfissaqalerluta, Jens-Jakob Lennert Sandgreen oqaluttuarpoq.
Taassuma erseqqissarpaa sammisaqarfimmi tech-imi taamatut taarsigassarsisinneqaerneq suliniutip aallarnisarnissaanut pitsaalluinnartuusoq, tassa aningaasaleerusussinnaasut ersiortinneqassanngimmata siusinaartumik naliliinikkut, piginneqatigiissutinik siusinaartumik agguaassinikkut imaluunniit suliniutip akiligassaqarfinnut allanut pisussaaffeqareernera pissutigalugu.
Allanngortissinnaavaa
– Grønlandsbankip Inuussutissarsiornermut Aningaasaateqarfianit akisussaafflimmik taarsigassarsiat aamma akuerinninnertut taaneqarsinnaapput, pissutigalugu aningaasaliiumasinnaasut takusinnaammassuk suliniummut alloriartoqareersimasoq aningaasaliisoqarlunilu, Jens-Jakob Lennert Sandgreen naliliivoq.
Akisussaaffilimmik taarsigassarsiat ukiuni arfinilinni taarsersugassaapput, aallartitsisullu akisussaaffilimmik taarsigassarsiat piffissaq sioqqullugu taarsersinnaavai.
Tamatuma saniatigut aallartisaasoq allanngortitsisinnaanermik taaneqartumik pisinnaatitaavoq, tassuunakkut akisussaaffilimmik taarsigassarsiat selskabip aningaasaataanut allanngortinneqarsinnaallutik, taamaasillunilu taarsigassarsiat taarsersorneqarnissaat erniaallu sipaarneqarsinnaallutik, tamatumunnga taarsiullugu Grønlandsbankip Inuussutissarsiornermut Aningaasaateqarfia selskabimi piginneqataalersikkaanni.