it
IT-mi pisortaq: Microsoft aaqqiissutaasussamik ikiuinngilaq
Namminersorlutik Oqartussani IT-mi pisortaq Tony Ditlevsdal saaffiginnikkaangat Microsoftip suliffiani sulisut assigiinngitsut oqaloqatigitinneqartarput
Namminersorlutik Oqartussat IT-mi pisortaata Tony Ditlevsdalip Microsofti pakatsissutigisorujussuuaa. Tassami Namminersorlutik Oqartussat mailsystemia iluarsinissaa anguniarlugu saaffiginnittaraluarpoq.
Iliuuseqartoqarumanngitsorli Tony Ditlevsdal Sermitsiaq.AG-mut oqarpoq.
- Sulisut tamarmik oqaluuttakkakka inussiarnersorujussuugaluarlutik iliuuseqarusunngillat, oqarpoq.
Akunnerit marluk
Tony Ditlevsdalip Microsoft ajornartorsiut pillugu saaffigaa ippassaq. Suliffeqarfissuarmi sulisunut allanut nuutsinneqaqattaarpoq, Tony Ditlevsdalillu akunnerit marluk saaffiginninniarnini, angusaqarfiunngitsoq, atorpai.
- Ajornartorsiutip aaqqiivigineqarnissaa soorluuna soqutigineqarpianngitsoq. Kalaallit Nunaanni Naalakkersuisut uani eqqugaaqataasut soorlu paasineq ajoraat, Tony Ditlevsdal oqaluttuarpoq.
Microsoftip mailikkut atortui, Livemail, Hotmail aamma Outlook.dk, Namminersorlutik Oqartussanut mailimik nassissiffigineqarsinnaanngillat.
Ullut 20-ssaa iluarsiniarneqarpoq
Namminersorlutik Oqartussani sulisup qasaraasiaa malwarenik imaqartoq uani mailimik ajutoornermi pissutaavoq, tamannalu pissutigalugu Namminersorlutik Oqartussanit mailit tusintilippassuit nassiussuunneqarsimallutik.
Namminersorlutik Oqartussani IT-leriffiup ajornartorsiut paasimmagu, sulisup mailiata passwordia allanngortippaa, spaminillu nassiussisoqarunnaarluni.
- Microsoftimut saaffiginnikkaluarpugut mailsytemi aallarteqqinniarlugu. Linkinik nassiussisarput, tassanilu immersugassanik nassiussisarput. Ullut tamaasa taamatut nassitsittarpugut ulluni kingullerni 20-ni, Tony Ditlevsdal oqarpoq.
Kikkut ikiuissanersut ilisimaneqanngilaq
Suliaq misissorneqassasoq Microsoftip Danmarkimi immikkoortortaqarfiata Sermitsiaq.AG-mut ilisimatitsissutigaa.
- Ikiuisimasinnaannginnerput ajuusaarutigaarput. Suliaq pillugu saaffiginnittoqarnissaa innersuussutigisinnaavarput, Microsoftimit oqaatigineqarpoq.
Taamatulli oqartoqarnera Tony Ditlevsdalimit paasiuminaatsinneqarpoq.
- Attaveqarfigiinnavinnikuuagut. Ilisimatinneqanngilagut ajornartorsiummut aaqqiissuteqarsinnaasumut sumut attaveqassanerluta, oqarpoq.