Isummersortoq: Kammalaatersortarneq akiorneqarli

- Ukiuni kingulliunerusuni naluneqanngilaq politikkimi kammalaatersortoqartartoq. Pisortat suliffeqarfiini aningaasatigut aqutsisut kammalaatersornikkut atorfinitsinneqartarnerat mianersuutassarujussuuvoq, atorfinititsinerimmi tunngavilersorneqarneq ajorput. Politikkikkut kammalaatersorneq takornartaanngilaq, politikkilu taamaattoq atortillugu pissaaneq aningaasanillu amerlanerusunik aallersinnaanerit anginerulersarput.

Sermitsiaq.AG-mi isummersortartoq Henrik Lund-Andersen ilaatigut allappoq. Kammalaatersorneq isummersornermini allaaseraa.

- Naalakkersuinermik maannakkut aqutsisuusut kammalaatersortutut oqaatigineqarsinnaapput, tassami atorfilittat pitsaagaluartut taarsersorneqarput, amerlasuut tunngavilerluagaanngitsumik soraarsinneqarlutik. Sulijunnaaraangamik annertuumik soraarnerannut akiliisoqartarpoq inuiaqatigiinnut iluaqutaanngitsumik. Aamma tunissutinik tunniussisarnerit amerlapput, paasiuminaalluni sooq ilumut tunissutinik tunniussisoqartarpoq aamma inuiaqatigiinnut iluaqutaanngitsumik, Henrik Lund-Andersen allappoq.

- Kalaallit Nunaat kammalaatersortarneq pillugu sulinialertuuppat periarfissarpassuarnik ammaasinnaagaluarpoq.

Henrik Lund-Andersenip isummersuutaa danskisuinnaq allaqqasoq ugguuna atuarneqarsinnaavoq.