Isummersorsinnaatitaaneq pisuussutillu uumaatsut nutaamik isiginiarlugit

Uranimik piaaffiup kingunerisai assilissami imaluunniit taallami ersissinneqarsinnaappat? Inuit ersinerat imaluunniit neriunnerat taalliap takutissinnaavai? Aamma oqaluttualiap pisuussutit uumaatsut pillugit oqallinneq allanngortissinnaavai?

Ilaatigut apeqqutit tamakkuupput inuit akissutissarsiffigisinnaasaat, unnugu sisamanngornermi Nuummi Katuami eqqumiitsuliorneq, pisuussutit uumaatsut aamma isummersinnaatitaaneq sammineqalerpata.

Kulturikkut, tusagassiornikkut aamma inuussutissarsiornikkut assigiinngitsut susassaqartut isummersinnaatitaanermut aamma pisuussutinik uumaatsunik eqqarsaatersuutiminnik saqqummiussissapput. Norskit kulturikkut illuata Kapittelip, Kalaallit Atuakkiortut aamma Tusagassiuinermi Sulisut Peqatigiiffiat suleqatigiinnerisigut aaqqissuussisoqarpoq, aaqqissuisut taama paasissutissiippput.

Aaqqissuussineq seminarimut angalaartumut Moving Summit on Oil and Literaturemut attuumassuteqarpoq. Norskit projektiat, kulturikkut, atuakkiornikkut, aningaasaqarnikkullu apeqqutinik, inuussutissanik aamma suliffeqarfissuarnik tunngasunut attuumassutinik misissuisut.

Seminarip angalanermini Nuummukannginnermini aqqusaarpai Stavangerimiit, Aberdeenikkut Reykjavikkimut Nuummullu.

Norgimeersoq Kjartan Fløgstad, pingaarnertut oqalugiartup ilaatigut atuakkiornerup oliasiornermut attuumassutaa oqaluttuarissavaa.

Tusagassiortoq Elna Egede saqqummiussissaaq, aamma eqqumiitsuliortoq Bolatta Silis-Høegh qalipakkami ilaanik uranisiornissamut akerliunerminut tunngasunik saqqummiissaaq, oqaluttuaralugulu eqqumiitsuliornini atorlugu isummersortarnini.

Nive Nielsen erinnamik atuissaaq, Kalaallit Nunaanni aatsitassarsiornermut tunngasumik taalliaminik. Aqutsisoq Juuaka Lyberth atuakkiortoq nipilersortartorlu erinnamik atuissalluni aamma neriorsuivoq.

Isummat assigiinngitsorpassuit
Unnummi tassani aamma kalaallit inuusuttut piukkunnaateqarluartut atuakkiortussat, ilaatigut Sørine Steenholdt aamma Maasi Chemnitz, Kalaallit Nunaat 2040-mi qanoq innissaanik takorluukkaminnik taallanik atuaassapput.

Jens B. Frederiksen True North Gemsimit aatsitassanik piaaffiup inuiaqatigiinnik kivitsisinnaaneranik oqaluttuassaaq, John Jakobsenil Grønlandsbankimit pisuussutit uumaatsunut eqqarsaatinik isummanillu saqqummiissaq.

Naggataagut Bjarne Lyberth KNAPK-mit aalisartut piniartullu isummersuutaannik saqqummiissaaq.

Aaqqissuussineq Katuap inersuaaraani nalunaaqutaq 19.00 aamma 21.00 akornanni ingerlanneqassaaq.