qinersineq
Isumasiuisitsineq kingulleq: Siumut siariartupiloorpoq - partiinilu anginersaanngorluni
Partii qineqqusaarnermi siullerpaamik maanna annerpaanngorpoq. IA tamatuma akerlianik maajimut sanilliullugu ilaasortaatitaminik sisamanik annaasaqartussatut inissisimavoq. Tamanna qinersisartunik isumasiuinermi nutaami takutinneqarpoq
HS Analyse tusagassiorfik Sermitsiaq.AG suleqatigalugu Kalaallit Nunaanni innuttaasut katitigaarnerannut naapertuuttumik sinniisunik novembarip 28-ani Inatsisartunut qinersinermi kikkunnik taaserusunnerannik isumasiuivoq.
Isumasiuineq inunnik 17-it sinnerlugit ukiulinnik ulluni tallimanngornermi novembarip 21-aniit sapaammut 23-anut oqarasuaatikkut apersuineq aqqutigalugu ingerlanneqarpoq. Isumasiuineq arnat angutillu, najugaqarfiit (illoqarfiit/nunaqarfiit), najugaqarfiit (nunap immikkoortui) ukiullu eqqarsaatigalugit innuttaasut katitigaanerannut naapertuuppoq.
Inuit katillugit 1003-t isumasiuinermut peqataapput, isumasiuinerlu tatiginassutsimik akuttoqatigiissaarineq 95-iutillugu 2,4 procentpointimik nalorninaateqarpoq.
Tassa isumasiuinermi ataqatigiinnerit pingaarnerit allanngorarnerisa 2,4 procentip iluaniinnerat 95 procentimik qularnaarlugu oqaatigineqarsinnaavoq.
Allaaserineqartoq AG-mi tamaat atuarneqarsinnaavoq. Aviisi akeqanngilaq uanilu aaneqarsinnaalluni. Aamma pisiniarfigisartakkanni aviisi akeqanngilaq - nalinginnaasumik aviisit naqiterneqartut amerlanerupput