Isumasiuineq: Suleqatigiissitsisut qinigaanissartik qularutiginngilaat

Qinersisartunik isumasiuneq siulleq Michael Rosingip nassuiarneqarpallaarnissaa aarlerisaarutigaa.

Suleqatigiissitsisut isumasiuinermut, partiimik 1,8 procentiinnarmik taaguunneqartussatut takutitsisumut sunnertinnianngilluinnarput.

Tassami ilaatigut isumasiuinerni taamaattuni partiinut mikinerusunut nalornissutaasoq annertusarpoq. Ilaatigut aamma qinersisartut pingajorarterutaat suli aalajanginngillat. Kingullertullu minnerunngitsumik partiip qinigassanngortitani aamma qineqqusaarutigini saqqummiuteqqaartussaavai.

- Qularutiginngilara ilaasortanngortitaqassalluta, partiimi siulittaasoq Michael Rosing oqarpoq.

Piffissap sivikitsup ingerlanerani siulittaasup nammineq aamma Tillie Martinussenip saniatigut kikkut qinigassanngortinnersut partiip oqaluttuariniarpaa. Partiillu anguniagai aamma erseqqarinnerusut nalunaarutigineqassallutik.

- Maanna qineqqusaarnerput aallartipparput. Naqqaniik aallartippugut, politikkerpullu saqqummiutereerutsigu isumasiuinermi allarluinnarmik takutitsisoqassaaq, Michael Rosing ajukkutinngitsoq oqarpoq.

- 30 procntit sinnerlugit suli aalajanginngillata, taamaammat isumasiuineq una tunuliaqutigalugu naliliineq siusippallaaqaaq, taanna oqarpoq.

Isumasiuineq HS Analysemi Sermitsiamut aamma KNR-imut suliarineqarpoq. Nalorninassusaa 2,7 procentimut naatsorsorneqarsimavoq.

Powered by Labrador CMS