Innuttaasut
Isumasiuineq: Innuttaasunik peqataatitsisoqarnerusariaqarpoq
Innuttaasunik peqataatitsisarneq politikkerit pikkorinneruffigisariaqarpaat, ICC Greenland aamma WWF isumaqarput
Isumasiuititsinerup takutippaa uuliasiornissamut misissuinissamut tunngatillugu innuttaasut sisamararterutaannaat innuttaasunik peqataatitsisarneq naammagisimaaraat. Misissuinermi peqataasut 6 procentii isumaqarput pitsaalluinnartumik ingerlanneqartoq, 19 procentillu naammagisimaarinnittut.
HS Analysep ICC Greenlandimut WWF-imullu innuttaasunik isumasiuititsinerani erserpoq.
Innuttaasut pingasorarterutaat isumaqarput innuttaasunik peqataatitsisarneq pitsaanngippallaartoq.
Uranimut akuersaanngilluinnarnerup atorunnaarsinneqarneranut atatillugu innuttaasut peqataatinneqarnerat pitsaanngippallaartoq misissuinerni ersertareerpoq, ICC Greenland aamma WWF tusagassiutinut nalunaaruteqarput.
Aamma innuttaasut amerlasuut isumaqarput aatsitassarsioqatigiiffiit uuliasiorfiillu innuttaasunit tusaaniarneqarnerusartut.
Pitsaanerulertariaqartoq
Qinersereernerup kingorna innuttaasunik peqataatitsinerulernissaq politikkerit sulissutiginerusariaqaraat ICC Greenland aamma WWF isumaqarput.
- Naalakkersuisuutitaqartut kingulliit marluk naammaginanngitsumik innuttaasunik peqataatitsisarput. Cairn Energymut tunngatillugu, London Miningimut tunngatillugu kiisalu uranimut akuersaanngilluinnarnerup atorunnaarsinneqarneranut tunngatillugu. Qinersisoqareerpat tamanna allanngortinneqartariaqarpoq, WWF-ip generalsekretæria Gitte Seeberg tusagassiutinut nalunaarummi oqarpoq.
Oqaaserineqartut ICC Greenlandip siulittaasuata Hjalmar Dahlip taperserpai.
HS Analysep isumasiuinera pillugu inernerit talerpiata tungaani takuneqarsinnaapput