meeqqat inuusuttullu
Isumasioqatigiinnerit pingajuat: IAp Lund Olsen pakatsissutigaa
Ilaqutariinnermut naalakkersuisoq Martha Lund Olsen meeqqat inuusuttullu pillugit pingajussaat isumasioqatigiinnissamut qaaqquneqarpoq. 'Inioqqutitsinerit' unitsinneqartariaqarput, IA-mit oqaatigineqarpoq
Inuit Ataqatigiit Ilaqutariinnermut Naalakkersuisoq Martha Lund Olsen Siumumeersoq apersorneqarnissaanik piumasaqaateqaqqipput. Apersuutigineqassapput meeqqat inuusuttuaqqallu angerlarsimaffiup avataanut inissinneqarsimasut pillugit kommunit akisussaaffimminnik maannamut kivitsinnginnerat.
- Maanna Naalakkersuisumit pingajussaat isumasioqatiserinnittariaqarpugut, ersarissigaluttuinnarmat politikkikkut oqarluartaarutit nalunaarutillu oqaasiinnaasut. Annerusumillu iliuuseqartoqarsimanani, Inuit Ataqatigiinnit Inatsisartuni Ilaqutariinnermut ataatsimiititaliami ilaasortaq, Juliane Henningsen, tusagassiutinut nalunaaruteqarpoq.
Inatsisartut Ilaqutariinnermut Ataatsimiititaliaata Naalakkersuisut peqqunikuuaat qulakkeeqqullugu, meeqqat inuusuttuaqqallu angerlarsimaffiup avataanut inissinneqarsimasut tamarmik iliuusissamik pilersaarummik nutartikkamik peqassasut kingusinnerpaamik 1. september 2014.
Meeqqat 240-t tikillugit inatsit malillugit pisinnaatitaaffimminnik - Juliane Henningsen naapertorlugu - peqanngillat.
- Isumaliutigisariaqarparput akisussaaffik pineqartoq qitiusumit isumagineqalissanersoq, iliuusissatut pilersaarutit kiisalu meeqqat ilaquttaminnut attaveqarnerat eqqarsaatigalugu. Ilaatigut ombudsmandip nalunaarusiai atuarlugit qiimmaallannanngilaq; meeqqat ilaquttaminnut ilaatigut attaveqanngivissortut kiisalu iliuusissamik pilersaarusiuunneqarsimanngitsut, Juliane Henningsen allappoq, suliarlu ilungersunartoq oqaatigalugu.