Angallanneq
Isumaqatigiissutinik annaasaqarnerup kingunerisaanik Air Greenland 75 millioninik annaasaqassaaq
Suliffeqarfiup Kujataani, Qeqertarsuup Tunuani kiisalu Ittoqqortoormiinut timmisartuussisarunnaarnissaa akisuvoq
Air Greenlandip ukiumut kaaviaartitat 75 millionit koruunit 2017-imit annaasalissavaat, tamanna suliffeqarfiup ilaatigut Namminersorlutik Oqartussanit pigineqartup angallassinermut kiffartuussinissamut isumaqatigiissutit taamaasa pissarsiarinngitsoorneranit kinguneqarpoq.
Atuaruk: Air Greenlandip atorfiit 45-t peertariaqarpai
Suliffiit 45-t atorunnaarsinneqartut
Suliffeqarfik taamaattumik atorfinnik 45-nik atorunnaarsitsisariaqalilerpoq. Air Greenlandip kisianni naqissuserpaa, ingerlatseqatigiiffiup soraarsitsinerit ikinnerpaatinniarsariniarpai, atorfinnut allanut nuuttarnerat, atorfiit inuttaleqqinneqartannginnerat assigisaallu aqqutigalugit.
Suliffeqarfiup aamma Qeqertarsuup Tunuani Kujataanilu angallassisarnertik annaavaat, Ittoqqortoormiinilu aamma timmisartuussisassanngilaq.
Illuanik timmisartortitseqatigiiffiup kiffartuussinissamut isumaqatigiissutinit aqqaniliusunit arfinillit tigummiinnassavai, Qaanaaq, Upernavik, Uummannaq kiisalu Tunumi sullissiinnassalluni.
Naleqqussaasariaqartut
- Kiffartuussinissamut isumaqatigiissutit isumaqatiginninniutigineqarnerisa inernerisaanik ingerlatseqatigiiffimmi niuerneq peqqissoq iluanaaruteqarfiusorlu ingerlatiinnarniarlugu Air Greenlandip aaqqissussaanerata naleqqussarneqarnissaa pissusissamisoorpoq pisariaqarlunilu, Air Greenlandimi siulersuisuni siulittaasoq, Søren Lennert Mortensen, tusagassiuutinut nalunaarummi oqarpoq.
- Tamanna ingerlatseqatigiiffimmut allanngornerujussuuvoq, tassami sulisutsinnit pikkorissunit amerlasuut inuulluaqqusariaqalerpavut. Ajoraluaqaaq, kisiannili tamakkuupput unammilleqatigiinnerup atugassarititai, taanna oqarpoq.
Atuaruk: Kommune Kujalliup kiffartuussinissamut isumaqatigiissut dumpertippaa
- Taamatulli oqareerlunga nuannaarutigaara, kiffartuussinissamut isumaqatigiissutit, niuerfitsinnut pingaarutilinnut ilaasut amerlanersaat ingerlateqqittussanngoratsigit, suliassarlu atuisunut qaffasissumik sullissinitta ingerlateqqinneratigut isumagissavarput, ilanngullugu oqarpoq.
Pitsanngorsaaneq
Atorfiit ikilisarneqarnerisa saniatigut ingerlatseqatigiiffiup ingerlatsinini pitsanngorsarniarpaa.
Atuaruk: Ilaasut timmisartorlutillu umiarsuartassapput
- Maannarpiaq kiffartuussinissamut isumaqatigiissutit annaasat kingunerisaannik Air Greenlandip aaqqissuussaanik naleqqussaavugut, aammalu ingerlatseqatigiiffiup unammillersinnaanerata nukittorsarneqarnissaa siunnerfigalugu suli sulivugut, Søren Lennert Mortensen oqarpoq.
- Tassani pitsanngorsaanerit pisariillisaanerillu sulissutigineqarneri ingerlaqqissapput, aammalu atuisut aallunneqarnerat annertuumik nukittortinneqassaaq, taamaalilluni aamma Air Greenland unammilleqatigiinnermi sakkortunerusumi nutaamilu siullertut toqqarneqarsinnaasassammat, taanna naggasiivoq.