Isumaqatigiissut nutaaq: EU arlalitsigut Kalaallit Nunaannut ikiuinissaminut piareersimasoq

Statsministeri Helle Thorning-Schmidt, Socialdemokraterne, aamma Naalakkersuisuni siulittaasoq Kim Kielsen, Siumut, EU kommissionip siulittaasua Jean-Claude Juncke peqatigalugu EU-p, Danmarkip Kalaallit Nunaatalu suleqatigiinnissamut isumaqatigiissutertik atsiorpaat sisamanngornerup ullaani.

Kalaallit Nunaata EU-mik suleqateqarneranik atsioqatigiinnerup 2007-meersoq sisamanngornermi isumaqatigiissutigineqartoq nutarterineruvoq.

- Danmarkip Kalaallit Nunaatalu EU-mik suleqatigiinnissamik atsioqatigiittoqarnera nuannaarutigaara. Atsioqatigiinneq Kalaallit Nunaata EU-mik suleqateqarneranut pingaaruteqarpoq.

- Suleqatigiinnitta annertusarneqarnissaa pingaartinneqartoq atsioqatigiinnerup takutippaa. Aatsitassarsiornikkut, silap pissusaanut tunngasunut, nukissatigut, ilisimatusarnikkut takornarialerinikkullu suleqatigiilluartoqarsinnaavoq Helle Thorning-Schmidt oqarpoq.

Nunatsinni ilinniartitaaneq
Kalaallit Nunaat EU-mik ilinniartitaanikkut suleqateqartut ilagaat. Suleqatigiinneq pissutaalluni Nunatsinni ilinniartitaaneq qaffasinneruvoq. Suleqatigiinneq 2007-mili aallartinneqarmat 2013-ip tungaanut EU 1 milliard koruuninik ilinniartitaanermut aningaasartuuteqarpoq.

Taamaasilluni ilinniarnertuunngorniarfinnut amerlanerusut atuartalerput kiisalu aamma ilinniaqqiffinnut allanut ilinniartartut amerlatsikkiartorlutik.

Allatigut ikiuineq
Suleqatigiinnermili aamma allatigut ikiuisoqassaaq. Aatsitassarsiornikkut, ilinniartitaanikkut, ilisimatusarnikkut allatigullu siunissami suleqatigiittoqassaaq.

- Issittoq soqutigineqaleraluttuinnarpoq. EU-p Issittumi politikkia Kalaallit Nunaannit ilusilersorneqaqataasinnaavoq. EU Issittumi aamma suleqataalluassasoq neriuppunga, Helle Thorning-Schmidt oqarpoq.

Issittumi suleqatigiittoqarnerani neriuutigaa Issittumi inuit qanoq inooriaaseqartuunersut paasineqarnerussasoq, soorlu puisip amiata tungaatigut.