qinersineq

Isumaqatigiipput: Politikerit atornerluisarneq unitsikkusuppaat

Partiit tamarmik Inatsisartunut qinigassanngortitaqartut landskarsip aningaasaataanik atornerluisarneq unitsikkusuppat. Tamanna marlunngornermi qineqqusaarnermi erserpoq

- Uagut politikerit nammineq qulakkeertussaavarput inatsisit malillugit siunnersorneqarnissarput, Sara Olsvig oqarpoq

Naalakkersuisunut siulittaasuusarsimasut marluk, Inuit Ataqatigiinneersoq Kuupik Kleist aamma Siumumeersoq Aleqa Hammond, tamarmik immikkut landskarsi inuttut namminneq atugassaminnik atorfigisarsimavaat taamatut atuinissamut aningaasanik immikkoortitsisoqarsimanngikkaluartoq.

Taamaaliortarnerlu partiinit tamanit Inatsisartunut sassartitaqartunit unitsikkusunneqarpoq.

- Uagut politikerit imminnitsinnut piumaffiginerusariaqarpugut, Siumup Inatsisartunut qineqqusaartitaa, Martha Lund Olsen, marlunngornermi tv-kkut radiokkullu toqqaannartumik qineqqusaartitsinermi oqarpoq.

Atuaruk: Hardenberg Kielsenimit tatineqarpoq - misissuisitsinissaq isumaliutigaa

Tamarmik atornerluisunik takoqqikkusunngillat
Taannalu kisimiinngilaq. Partiimmi tamarmik Inatsisartunut qineqqusaarnermi sassartitaqartut isumaqarput politikerit imminnut piumaffiginerusariaqanngikkunik atorfilittanit nakkutigineqarnissaminnut piumasaqarnerusariaqartut.

- Sinaakkutissat ersarissut pigineqartariaqarput, Demokraatit sassartitaat taama oqartut, Partii Naleqqap sassartitaa, Peter Møller, isumaqarpoq inatsisiliortoqartariaqartoq.

- Inatsisiliortoqartariaqarpoq karsimit kaatortoqaqqissanngippat, Peter Møller oqarpoq.

Atassut maleruagassanik sukatererusuppoq
Namminersorlutik Oqartussat politikerinut ilaquttaminnik angalaqateqarniartunut ullumikkut akiliussigallarnissaminnut periarfissaqarput. Akiliussigallarnerli angalanissap aallartinnginnerani akiliunneqartumit akilereerneqarsimasussaavoq. Aalajangersagaqareeraluartorlu Atassummit isumaqarput malittarisassat ullumikkut misissoqqinneqartariaqartut.

- Cirkulærit allallu misissorneqartariaqarput naleqqussarlugit sukaterlugillu, Atassummeersoq Siverth K. Heilmann oqarpoq.

Taakkua saniatigut Inuit Ataqatigiinnersoq Sara Olsvig isumaqarpoq politikerit qinersisartullu imminnut piumaffiginerusariaqalersut.

- Qinikkat imminnut piumaffiginerusariaqarput suliaminnik ileqqorissaarlutik ingerlatsinissaminnut, Sara Olsvig, qinikkat inatsisit atuuttut pillugit ilisimasaqarnerusariaqarnerannik isumaqartoq, oqarpoq nangillunilu:

- Uagut politikerit nammineq qulakkeertussaavarput inatsisit malillugit siunnersorneqarnissarput, Sara Olsvig oqarpoq.

Powered by Labrador CMS