Isumaqatigiinniarnerni alloriaqqinnissaq tulleq nipangiusimaneqartoq

Venstrep siulittaasuata Lars Løkke Rasmussenip naalakkersuisunik pilersitsiniarluni isumaqatigiinniarneri arfininngornermi aallartinneqartut sapaammilu ingerlateqqinneqartut pillugit annertunerusumik saqqummiussisoqanngilaq.

Piviusorsiornerpaagallartoq tassaavoq Lars Løkke Rasmussen talerperlernik tassaasunik Venstre, DF, Liberal Alliance aamma De Konservativenik amerlanerussuteqartunik naalakkersuisunngortitsiniarnerminik taamaatitsiinnarnerminik ungasinngitsukkut nalunaassasoq.

Suliariniagaagalua iluatsinngitsoorpat dronningiliartoqaqqissaaq, tamatumalu kingorna Lars Løkke Rasmussen ikinnerussuteqartunik naalakkersuisunngortitsissagunartoq.

Venstrep siulittaasuata tulliata Kristian Jensenip susoqarnissaa oqaatigerusuppallaanngilaa.

- Oqaasissaqanngilanga, Lars Løkke Rasmussen naalakkersuisunik amerlanerussuteqartunik pilersitsinissamik taamaatitsiinnarsimaneranik apeqqummut akissuteqarluni sms-ikkut Ritzauimut allappoq.

Kunngikkormiunit aamma Amalienborgimi dronningiliartoqarnissaanut nutaamut aggersaasoqarsimanersoq oqaatigineqarsinnaanngilaq.

- Tamanna pilllugu ministeriuneqarfimmit nutaarsiassanik utaqqisariaqarpusi, kunngikkormiut attaveqarnermut pisortaat, Len Balleby,sms-ikkut allappoq.

Lars Løkke Rasmussen Folketingimi partiinik tamanik arfininngornermi ataatsimeeqateqarpoq amerlanerussuteqartunik naalakkersuisunngortitsisoqarsinnaanersoq takusinnaajumallugu.

Sapaammi isumaqatigiinniartoqaqqippoq. Tamatumuuna Folketingimut ilaasortat Kalaallit Nunaanneersut Savalimmiuneersullu sisamat ataatsimeeqatigineqarlutik.

- Folketingimi partiit tamaasa ippassaq oqaloqatigaakka, taakkualu tamarmik naalakkersuinik nutaanik pilersitsinissamut atatillugu tamarmik isumalluarnartunik siunnersuuteqarlutik - ullaap-tungaani ullup-qeqqa ilanngullugu Folketingimut ilaasortat sisamat Kalaallit Nunaanni Savalimmiunilu qinigaasut oqaloqatigaakka, Lars Løkke Rasmussen Facebookimi sapaammi allappoq.

Lars Løkke Rasmussen arfininngornermi isumaqatigiinniarnerit ingerlanneqariiginnartulli nassuerpoq, suliassaq ajornakusoortoq, kisianni taamaatitsiinnarsimanani.

- Ajornakusoortutut isikkoqarpoq, tamannali aqagu (sapaammi, aaqq.) uterfigalugulu naliliiffigissavara, Løkke TV2 Newsimut oqarpoq.

- Naalakkersuisunik suleriallaqqissuseqartunik pisariaqartitsivugut, aamma naaperiaaqatigiinnerit amerlanerussuteqartunik naalakkersuisunngortitsinissamut pisariaqartussat ima qajannartigippata partiit sinnerinik suleqateqarsinnaanata, tamanna iluaqutaanavianngilaq, ilassuteqarluni oqarpoq.