Arctic Winter Games

Isumaqatigiinneqarpoq: AWG 2014-imi ilikkakkat pingaarnersaat aaku

- AWG 2014-imi peqataalluni assorsuaq ilikkagaqarnarlunilu misigisaq pissanganarpoq, politikerit pingasut Kommuneqarfik Sermersuumit peqataatinneqartut oqarput

Kommuneqarfik Sermersuumi borgmesteri Asii Chemnitz Narup IA-mit, borgmesterip tulliata aappaa Martha Abelsen Siumumeersoq kiisalu Meeqqanut, Ilaqutariinnut Atuarfeqarnermullu Ataatsimiititami siulittaasup tullia, Uju Petersen IA

Kommuneqarfik Sermersuumi borgmesteri Asii Chemnitz Narup, borgmesterip tulliata aappaa Martha Abelsen aammalu Meeqqanut, Ilaqutariinnut Atuarfeqarnermullu Ataatsimiititami siulittaasup tullia, Uju Petersen Fairbanksimi misigisaqarluarsimaqalutik angerlamut uteqqammerput.

Politikerit AWG-tut aaqqissuussamik annertuumik qanoq ingerlatsisoqartarneranik paasisaqarluarsimapput. Politikerit isumalluartut pingasut AWG-ip Kalaallit Nunaanni illoqarfiit pingaarnersaanni 2016-imi ingerlanneqarnissaanut qilanaarput.

- AWG 2016-imi Nuummi ingerlanneqalerpat qanoq nuannertigissanersoq, Fairbanksimukarnitsinni politikeritut alaatsinaatsutullu paasisaqarluarlungalu uppernarsivara. Ataatsimoorluta suliassatta, uagut nammineq 2016-imi AWG aaqqissuuttussanngorutsigu atugassatsinnik ilisimasassarpassuit pissarsiaralugillu sapaatip akunnera tamaat isumassarsiaqarfigaarput, Martha Abelsen oqarpoq.

-Tikerartussat 2000-it tamarmik nunatsinnut tikilluaqquneqartutut misigisimassappata, namminneq kajumissutsiminnik suleqataarusuttut tamaasa amerlasoorsuillu pisariaqartippavut. Kalaallit Nunaata aaqqissuussinermik taamak annertutigisumik ataqatigiissaarisinnaanera takutitsigu. Suleqatiginninnissamut peqataaqqusivugut.

Suliassat pingaarutillit
Asii Chemitz Narup-ip Martha Abelsenip oqaasii taperserpai:

- Soorunami marsimi 2016-imi unammijuaartitsinissat naammassineqarnissat pingaaruteqarpoq. Kisianni AWG 2014-imi peqataanitsigut, tamat oqartussaaqataanerisa nukittorsarneqarnissaannut, piginnaasatta annertusarnissaannut, kinaassutsitsinnik annertunerusumik saqqummiussinissatsinnut nunarsuarmullu ammaassinissatsinnut tamassuma atorluarneqarnissaanut periarfissatsialaavoq. Annertuunik aaqqissuussinernik suliaqarnissatsinnut ilikkagaqarpugut, aammalu misilittakkat misigisallu inuusuttortatsinnut ingerlateqqissinnaalerlugit.

Borgmesteri Asii Chemnitz Narup, Martha Abelsen Uju Petersenilu nunarput sinnerlugu peqataasut pilluaqquaat:

- 60-inik ujaminnannissinnik pilluaritsi. Aammalu kulturikkut aaqqissuussinut kusanartumik takutitsinerannut qujanarujussuaq - pikkoreqaasi. Tamavissi Kalaallit Nunaat sinniisuuffigilluarparsi.

Powered by Labrador CMS