saammaateqatigiinneq
Isumalioqatigiissitap suliani naammassivaa
Saammaateqatigiinnissamut isumalioqatigiissitap ukiuni pingasuni affaanilu suliani naammassivaa, ullumikkullu isumaliutissiissutini aamma innersuussutini Naalakkersuisunut tunniutissavai.
Isumalioqatigiissitaq 2014-imi aasakkut pilersinneqarami ataatsimut akisussaaqatigiilluni pitsaasumik ineriartornermut peqataanissaq siunertarineqarpoq.
Ataqqeqatigiinneq
- Inuiaqatigiinni assigiinngisitaartunik innuttalimmi innuttaasut ukiut ingerlanerini pisunit, oqaluttuarisaanermi iliuuserisanit aalajangiinernillu eqqaamasaat isumaallu assigiinngitsut ataqqineqassapput. Pissutsit tamakku oqallisigissallugit ullutsinnilu inuiaqatigiinni pissutsinut pingaaruteqartuuneri kiisalu innuttaasut inuunerminni atugarisaannut pingaaruteqarnerisa paasinartunngortinnissaat pingaartuuvoq - inuup immikkut nammineq aamma inuiaqatigiit kalaallit imminnut ataqqinninnerinut iluaqutaasumik, suliakkiissummi sulinermut sinaakkusiisumi tamanna allaqqavoq.
Nangilluni ima allaqqavoq:
- Saammaateqatigiinnerup ingerlanneratigut inuiaqatigiinni pissutsit pillugit ilisimasanik tunniusseqataassaaq innuttaasullu akunnerminni paaseqatigiinnerat annerulerluni. Nammineq aallaavigisamik ilisimasaqarnerulerneq inuiaqatigiinnut ilassiortunut ataqqinnittunullu toqqissisimasumillu ineriartornermut periarfissaqarluarnerulersitsissaaq.
Saammaateqatigiinnissamut isumalioqatigiissitami ilaasortat sisamanit arfiniliusimapput, ukiullu ingerlanerini annertuumik taarseraallutik. Suliaq allattoqarfimmit taperserneqarnikuuvoq, ukiumullu 2,4 millioninik akeqarnikuulluni.
Aleqa Hammondip Naalakkersuisunut siulittaasuunerata nalaani isumalioqatigiissitamut sinaakkutit inissinneqarput, tassani Siumut Atassummit aamma Partii Inuinit taperserneqarluni.
Ilaasortat
Ilaasortat ukuusut isumaliutissiissut Nuummi Katuami tunniutissavaat: Isumalioqatigiissitami siulittaasoq Josef Therkildsen, Dorthe Kathrine Olsen, Ida Mathiassen aamma Iisaavaraq Petrussen. Karla Jessen Williamsson ataqqinaammik ilaasortaavoq.