isumalioqatigiissitaq

Isumalioqatigiissitami ilaasortat maanna akissarsiaqaleriasaassapput

Tunngaviusumik inatsisissaq pillugu isumalioqatigiissitap suliarisassap nassuiarneqarnerata killormoortuanik, isumalioqatigiissitami ilaasortat maanna sulinerminnut akissarsiaqarniarpasilerput.

Vivian Motzfeldt
Vivian Motzfeldt henviser til Naalakkersuisut vedrørende oplysningerne om, at Forfatningskommissionens medlemmer skal til at have vederlag.

Tamanna 2018-imut aningaasanut inatsisissami, Inatsisartut amerlanerussuteqartut ataasinngormat akuerisaanni atuarneqarsinnaavoq.

Atorfilittut inigisaq
2018-imi aningaasanut inatsisissami 500.000 koruuninik saniatigut immikkoortitsisoqarpoq, taakku ilaatigut isumalioqatigiissitami siulittaasup Vivian Motzfeldtip atorfilittut inigisassaanut aningaasartuutinut matussusiisussaapput.

Ilanngussani atuarneqarsinnaavoq ''aningaasaliissutit ilanngunneqartut (500.000 koruunit, aaqq.) Tunngaviusumik inatsisissaq pillugu isumalioqatigiissitami ilaasortat akissarsiaqartinnerannut atorneqarsinnaapput''.

Taakku oqaaseqatigiit Tunngaviusumik inatsisissaq pillugu isumalioqatigiissitap atuunnerata tunngavianut tulluanngillat.

Suliassap nassuiarneqarnerani ima allaqqavoq:

- Inatsisinut tunngaviusussanut isumalioqatigiissitami ilaasortat isumalioqatigiissitami sulinertik pillugu immikkut akissarsiaqassanngillat, tassa sulineq Inatsisartuni ilaasortatut sulinerup nalaani sulinertut isigineqartariaqarmat. Tamanna aamma isumalioqatigiissitami siulittaasoqarfimmut atuutissaaq.

Motzefeldt Naalakkersuisunut innersuussivoq
Sermitsiaq.AG-p Vivian Motzfeldt oqaloqatigaa, taannalu akissarsiaqarnermut tunngasunik apeqqutinut tunngatillugu Naalakkersuisunut innersuussivoq. Akissarsiat sunut tutsinneqarnissaat itisilernissaa kissaatiginngilaa.

Michael Rosing attaviitsutut ataatsimiititaliam, Tunngaviusumik inatsisissaq pillugu isumalioqatigiissitamut suliaqartumut ilaasortaasinnaatitaavoq. Vivian Motzfeldtip atorfimmut Taassuma atorfilittut inigisamik Vivian Motzfeldtimut tunniussinissamut pilersaarutit imaluunnit ilaasortanut akissarsititsisarnissat tusarnikuunngilai.

Oqartussaaqataaneq eqqarsaatigalugu qularnaatilik
- Vivian Motzfeldtip atorfilittut inigisaqarnissaa ajoriffissaqartinngilara. Kisianni piisaartutut nipeqarsinnaagaluartoq akunnittarfimmiititsinermit tamanna aaqqiissut akikinnerusinnaavoq. Illuanik tamat oqartussaaqataanerannut tunngatillugu, Tunngaviusumik inatsisissaq pillugu isumalioqatigiissitap suliassaasa nassuiaataannik Naalakkersuisut namminneerlutik allanngortitsisinnaanerat qularnartoqartittorujussuuara. Inatsisartut avaqqullugit tamanna pivoq, tamatumunnga tunngasumik ataatsimiititaliaq kisimi paasitinneqartussaammat. Taamani uanga tamanna uparuarnikuuara, maannalu Naalakkersuisut nammineq isumartik atorlugu sinaakkutit allanngortinniarlugit eqqarsarnersut takuarput, attaviitsoq Michael Rosing oqarpoq.

2018-imi aningaasanut inatsisissamut ilanngussani allaqqavoq ''tunngaviusumik inatsisissap nassuiarneqarnerani ilassummi aningaasat qanoq atorneqarnissaat nassuiarneqassapput''. Ilassutissaq qaqugu saqqummiunneqassanersoq ilisimatitsissutigineqanngilaq.

Powered by Labrador CMS