sumiginnaaneq
Isumaginninnermut siunnersortit sulerulunnerannut oqilisaasoqarniartoq
Inunnik isumaginninnermut siunnersortit kommunini sulisut suliassarpassuaqarput. Suliat qummut amerlanerpaafilerneqarsinnaanersut, nalunaarusiap misissorniarpaa
Namminersorlutik Oqartussat meeqqanut inuusuttunullu isumaginninnermut nakkutilliisuisa, ajoraluartumik kommunini arlalinni ajortumik ingerlasoqartoq siorna qulaajarpaa.
Tassani meeqqat inuusuttullu atugarliortut sumiginnarneqartarput. Ilaatigut isumaginninnermut siunnersortit iluamik qisuariartannginnerat pissutaalluni. Kommunit naapertorlugit isumaginnittut amigarnerat tamatumunnga pissutaasut ilagaat, isumaginninnermullu siunnersortit sinneruttut amerlanngitsut sulerulummata.
Meeqqanik sumiginnaaneq
- Kommuneqarfinni tamani meeqqanik sumiginnaaneq, sullissisussaaleqineq, isumaginninnikkullu siunnersuutivut ulapippallaarujussuarnerat angummassinnaanngitsullu nakkutilliisunit meeqqallu illersuisuanniit oqariartuutigineqartualersimavoq, IA-mit Inatsisartunut ilaasortaq, Peter Olsen erseqqissaavoq.
Taanna paragraf 37 napertorlugu apeqqutinik arlalinnik nassiussisimavoq.
- Isumaginninnikkut siunnersortit kommuneqarfinni isumaginninnerup iluani suliarisartagaannik (sagsbehandlerit) qummut amerlanerpaaffiliisinnaanermik Naalakkersuisuninngaaniit pilersaaruteqarpat?, Peter Olsen aperivoq.
Kommunit suliassaat
Tassani naalakkersuisoq Randi Vestergaard Evaldsen akisinnaannginnerarpoq. Kommunini isumaginninnikkut suliaqartut suliarisinnaasaat qummut amerlanerpaaffilerneqarnissaannut, Naalakkersuisut maannamut pilersaaruteqanngillat. Ilaatigut isumaginninnermut siunnersortit sulinerminni atugaat kommunit suliassarimmassuk. Naalakkersuisulli tamanna misissorniarpaat.
- Inatsisartut 2016-imi ukiakkut katersuunneranni kommunini suliarineqartartut amerlassusaat pillugit pingaarnerusutigut nalunaarusiaq Naalakkersuisut saqqummiunniarpaat. Nalunaarusiaq ilaatigut aqqutigalugu sullissisut suliarisartagaat siunnerfeqartumik aalajangersaaffigineqarsinnaanersut aamma siunertamut naapertuunnersut isummerfigineqassaaq, Randi Vestergaard Evaldsen oqaluttuarpoq.
Aningaasarsiat naammaginanngitsut
Aningaasarsiat ikippallaarnerat kommunit naapertorlugit ajornartorsiutit ilagaat, taamaalillutik inunnik isumaginninnermut siunnersortit allamut suliffissarsiortartut.
- Allaat oqariartuutigineqartalersimalluni isumaginninnikkut siunnersortivut ilinniakkaminnik suliaqaratik suliffinni allani sulinissartik soqutiginerulersimagaat, akissarsiatit annikippallaaqimmata suliffimminnilu atugassaritinneqartut pitsaanngippallaaqimmata. Pissutsit taamaattut akuerineqarsinnaanngillat, meerartavut taakkunanngalu sullissisugut pitsaanerusumik atugassaqartinneqartariaqarput, IA-mersoq Peter Olsen, paragraf 37 naapertorlugut apeqquteqarnermini erseqqissaavoq.
Akissutini takuneqarsinnaavoq, kommunini inunnik isumaginninnermut siunnersortit agguaqatigiissillugu qaammammut 30.966 koruuninik akissarsiaqartut. Isumaginninnermi siunnersortit AK-p 2012-imi upernaakkut isumaqatiginninniarneranut atatillugu kingullermik isumaqatigiissuteqarfigineqarput.