Danmark

Isumaginninnermut politikki: Isumassarsioriartorlutik angalasorpassuit

Kommunini politikerit aamma kommunini Namminersorlutik Oqartussanilu atorfilittat ulluni makkunani atorfimmi suliassaqarlutik inunnik isumaginninnermut ilaqutariinnermullu politikkimi pitsaanerusumik isumassarsioriartorlutik angalapput

Kalaallit Nunaannit angalaqatigiissitat Taastrupimi Handicaporganisationernes Husimi assiliseqatigiittut.Angalasut ukuupput Poul Hansen, Uju Petersen aamma Søren Valbak tamarmik Meeqqanut aamma Ilaqutariinnermut ataatsimiititaliameersut, Malene Lynge, Peter Davidsen aamma Ane Egede Mathæussen Sermersuup Inunnik isumaginninnermut ataatsimiititaliaaneerput ingerlatsinermut pisortaq Grethe H. Nielsen peqatigalugu. Qasuitsup Kommunianit Isumaginninnermut ataatsimiititaliap siulittaasua, Kristian Jeremiassen ilaasortallu Naja Petersen, Jørgen Kruse, Bendt Kristiansen aamma pisortaq Henrik Sòloy. Kujataanit siulittaasoq Stine Egede Nørbæk, Karla Egede Bisgaard aamma Bodil Svare. Qeqqata Kommunianit Ilaqutariinnermut ataatsimiititaliamit Evelyn Frederiksen, Gedion Lyberth, Tønnes Kreutzmann, Bitten Heilmann aamma pisortaq, Paneeraq Olsen, kiisalu Bertha Dalager, ilaqutariinnermut aqutsisoqarfimmi Qeqqani pisortaq. Kanukokamit Kisea Bruun, siunnersortaasoq aamma siulittaasoq, Palle Jerimiassen. Naalakkersuisunit Martha Lund Olsen naalakkersuisoqarfimmilu pisortaq, Julie Præst Wilche, aammalu allatsini Hanne Nielsen peqatigalugit

Inuit 28-t nuna tamakkerlugu kommunineersut maannakkorpiaq Danmarkimi sapaatip-akunnera angalaarput.

Ilaqutariinnermut Naalakkersuisoqarfik naapertorlugu, suliamut atatillugu kommunit allat innarluutilinnut, atornerluisunut aamma meeqqanut inuusuttunullu atugarliortunut suliatik qanoq kivittarneraat isumassarsiorfiginissaa angalanerup siunertaraa.

Ingammik taakkartorneqartoq kingulleq - meeqqat inuusuttullu amerlasuut atugarliortut - aasaaneranili meeqqat illersuisuata Aviâja Egede Lyngep Qaasuitsup Kommuniani erseqqissaatigimmagit oqallisaangaatsiarnikuuvoq.

Atuaruk: Perorsaasut ilinniartitsisullu meeqqat illersuisuat taperserpaat

Tamatuma kingorna ilaqutariinnermut naalakkersuisoq, Martha Lund Olsen (S), Danmarkimi socialministeriusoq Karen Ellemann (V) arlaleriarluni ataatsimeeqatigisareerpaa.

Isornartorsiuinerlu aamma Kalaallit Nunaata inunnik isumaginninnermut suliat kivissinnaaneraa oqallisaaleraluarpoq, tassami nunanut allanut sanilliullugu arlalitsigut kinguarsimanerugami.

Atuaruk: Kalaallit Nunaannit isumaginninnerup tiguneqarnissaa Folketingimi amerlanerussuteqartut itigartippaat

Uani kommunit sulinerminnut atatillugu angalaqatigiinnerannut, Martha Lund Olsen akisussaasutut peqataavoq. Taanna tassani kommunini sisamaasuni qinikkat isumaginninnermut ataatsimiititalianeersut, taakkulu pisortaat aamma Kanukokamit siunnersuisui, qallunaat suliffeqarfii aammalu kommunini aqutsisoqarfiit pulaaqattaarpaat.

Periuutsinik nutaanik ilinniartut
Angalaqatigiit ilaatigut Herningip kommunianukassapput, tassani taakkua ‘Sverigemi-ilusiliineq’ aallaavigalugu suliassanik suliarinninnermi suleriaasii nutaat annertoorujussuarmik iluarineqarsimallutik.

Tamatuma saniatigut angalaqatigiit Danmarkimi sumiiffiit assigiinngitsut, utoqqarnut aamma innarluutilinnut suliassaqarfimmi suleriaatsit atortullu nutaat atorlugit suliaqarfiusut takusassavaat.

Atuaruk: Qaasuitsoq Naalakkersuisunit ikiorneqassaaq

Powered by Labrador CMS