Thursday, November 2, 2017 - 12:11

Isumaginninnermik siunnersortinut inunnillu sullissisut isumaqatigiissutaat atsiorneqartoq

Ukiuni arlalinni isumaqatiginninniarnerit ingerlanneqareerlutik isumaginninnermik siunnersortit inunnillu sullissisut isumaqatigiissutaat atsiorneqarpoq

Atorfillit Kattuffiat (AK) Namminersorlutillu Oqartussat ullumi, sisamanngornermi, inunnik isumaginninnermik suliaqartunut, tassalu inunnik isumaginninnermi siunnersortinut sullissisunullu, akissarsiaat sulinermilu atugaat pillugit isumaqatigiissummik atsioqatigiipput.

Atorfillit Kattuffiat tusagassiuutinut nalunaarummi allappoq.

- Isumaqatigiissummik peqalernissaat ukiuni arlalinni AK-p NIISIP-illu piviusunngornissaa sulissutigereerlugu ullumikkut
piviusunngormat tamanna nuannaarutissaavoq annertooq soorngunalumi neriuutigineqarpoq taamatut suliallit sulinermi atukkamikkut pitsanngorsaavineqarnerisigut sulinerminni oqinnerusunik atugaqarnerulernissaannut isumaqatigiissutip aqqutissiuusseqataaffigiumaaraa, Atorfillit Kattuffiani siulittaasoq, Dina Olsen, tusagassiuutinut nalunaarummi oqarpoq.

Siusinnerusukkut inunnik sullissisut inunnillu isumaginninnermi siunnersortit atorfeqarnerminni isumaqatigiissummik taama illersugaanikuusimanngillat.

- Isumaqatigiissutip iluani sullissisumut ataatsimut suliat amerlassusissaannik killiliisarnissaq pillugu AK-mit anguniarneqarsimagaluarpoq tamannali maanna piviusunngorsinnaanngikkallarpoq taamaattorli inatsisitigut taamaattumik
peqalernissaa siunertaralugu politikkikkut pilersitsiniartoqarnissaa siunertaasoq Namminersorlutik Oqartussanit oqariartuutigineqarluni tamannalumi piviusunngortinneqassanersoq AK-mit piffissami aggersumi malittareqqissaarneqarumaarpoq, Dina Olsen erseqqissaavoq.

Seneste nyheder / Nutaarsiassat kingulliit