Meeqqanik isumaginninneq

Isumaginninnermi siunnersortit 18-it ilinniarnerminnik naammasseqqammertut

Meeqqat pillugit suliat ajornakusoortut suliarinissaannut ilinniaqqiffimmi nutaami isumaginninnermi siunnersortit 18-it ilinniarnerminnik naammasseqqammerput.

18 nyuddannede socialrådgivere står efter en efteruddannelse nu bedre rustet til at håndtere børnesager.

Meeqqat pillugit suliat ajornakusoortut suliarinissaannut ilinniaqqiffimmi nutaami isumaginninnermi siunnersortit 18-it ilinniarnerminnik naammasseqqammerput.

Inatsisitigut, tarnikkut isumaginninnermilu suliatigut piginnaanerit atorlugit isumaginninnermi siunnersortit meeqqat ilaqutariillu atugarliortut nukittunerusumik suliniuteqarfigineranni isumaginninnermi siunnersortit suleqataasinnaapput.

Unammilligassat

- Isumaginninnermi unammillernartut annertuut maanna nalaateqqavagut. Atukkat unammillernartut isumaginninnermi siunnersortinik suliamut immikkut ilisimasalinnik pisariaqartitsisut. Peqatigitillugu isumaginninnermi siunnersortit inuttut unammilligassat annertuut ulluinnarni sulinerminni nalaattakkatik suliarisinnaassavaat, Isumaginninnermut, Ilaqutariinnut, Naligiissitaanermut Inatsisinillu atuutsitsinermut Naalakkersuisoq, Sara Olsvig taama oqarpoq.

Isumaginninnermi siunnersortit suliamut pikkorissarsimasut ilaatigut sumiginnaaneq, kingunerlutsitsineq siusissukkullu innarligaasimaneq pillugit ilisimasassanik atuagarsornikkut annertuumik toqqammavissaqalersimapput. Atuagarsornikkut ilisimalikkat sungiusarnikkut misilittarsimavaat.

Isumaginninnermi siunnersortit ulluinnarni meeqqanik ilaqutariinnillu ajornartorsiortunik suliaqartarnerat artornarsinnaasarpoq. Taamaattumik imminut suliarineq siunnersorneqarnerlu ilinniaqqiffimmi sammisat pingaarutillit ilagisimavaat.

Sullissinerup nukittorsarneqarnissaa

Isumaginninnermi siunnersortinik ilinniaqqiffik Naalakkersuisoq Sara Olsvigip assut tulluusimaarutigaa.

- Pingaarutilerujussuuvoq ataavartumik meeqqanut ilaqutariinnullu sullissinerup nukittorsartuarneqarnissaa ukkatarissallugu. Isumaginninnermi siunnersortinik ilinniaqqiffik meeqqat ilaqutariillu atugarliortut pitsaanerusumik atugassaqalernissaannut alloriarneruvoq pingaarutilik. Matumuuna siunissamik pitsaanerusumik pilersitsinissaminnut nukittunerusumik tunngavissaqalissapput, Sara Olsvig oqarpoq.

Ilinniaqqiffik ukiuni pingasuni ingerlanneqartartoq Isumaginninnermut, Ilaqutariinnut, Naligiissitaanermut Inatsisinillu atuutsitsinermut Naalakkersuisoqarfiup aamma cand. psych. aut, supervisori tarnikkullu katsorsaanermik immikkut ilisimasalik, Conni Gregersenip suleqatigiinnerisigut neqeroorutigineqarpoq.

Powered by Labrador CMS