pilluaritsi
Isumaginninnermi ikiortinngortut 19-it
Nunarput isumaginninnermi ikiortinik pisuujuneruallalaalerpoq. Perorsaanermik Ilinniarfik Ilulissaniittoq pingasunngornermi pingaartorsiorfiuvoq
Isumaginninnermi ikiortinngortut 19-it Perorsaanermik Ilinniarfimmi Ilulissaniittumi ullumi allagartartaartinneqarput.
Isumaginninnermi ikiortinngortut ukiuni marlunni ilinniareerlutik, naammassinnilluarlutik tulluusimaaqisut, rektor Nuka Kleemannimit ilinniarsimanermut uppernarsaammik tunineqarput.
Isumaginninnermi ikiortinngortut ilinniarnertik naammassivaat, ilinniarnerminni nunap immikkoortuini Qaqortumi, Nuummi, Maniitsumi Ilulissanilu atuagarsoreerlutik, illoqarfigisaminni suliffimmi misiliinerminni qitiusumillu ilinniarfimmi ukiup affaa seminariami ingerlatereerlugu.
- Perorsaanermik Ilinniarfimmi allagartartaarneq pingaartorsiutaavoq, Isumaginninnermi ikiortinngortut ilinniarnertik naammassigaat nutaallu unammisassat utaqqisut ilaqutai qanittumiit ungasissumiillu aggerlutik ulloq pingaartoq nalliussiartorpaat, ilinniarfik taama tusagassiuutinut nalunaaruteqarpoq.