uulia siulleq
Issittup uuliaa Rotterdam-imut
Det Arktiske Oceanimit russit uulia qallugaat siulleq maajip aallaqqaataani Rotterdam-imut tikiunneqassaaq, Greenpeace mamiasuppoq
Uulia akuiagassaq nappartat 550.000-t, Ruslandip avannaani Det Arktiske Ocean-imeersut maajip aallaqqaataani Hollandimi Rotterdam-imut tikiunneqassapput. Taamatut paasissutissiivoq DutchNews.nl.
Uulia akuiagassaq taanna Issittup imartaani uuliamik qillerinerneersuuvoq siulleq. Uulia akuiagassaq russit uuliasioqatigiiffiannit Gazprom-imeersoq maanna Ruslandip avannaanit Hollandimut umiarsuaanneqartoq, siullermik uuliamik akuiaavimmi akuiarneqariarluni atuisartunut tunisassiarineqassaaq.
Greenpeacemi Issittumut akisussaasoq Jon Burgwald isumaqarpoq politikerit malinnaasimanngitsut.
– Uuliasioqatigiiffiup Gazprom-ip naalagaaffimmit tapiiffigineqartup Det Arktiske Oceanimi qillerineri maanna ingerlanneqartut ulorianartoqartorujussuupput. Ruslandip avannaani avatangiisinut ulorianartoqaannaratik aamma Det Arktiske Oceanimut tamarmut ulorianartorsiortitsipput, Jon Burgwald Sermitsiaq.AG-mut oqarpoq.
Kinguneqaatissat ajorluinnartut
Issittumi uuliaarluertoqassappat tamanna ajunaarnersuarmik manna tikillugu takuneqarsimanngitsumik kinguneqassaaq, Greenpeace isumaqarpoq.
– Ajutoortoqarpat uulia akuiagassap katersornissaa ajornarluinnassaaq. Pinngortitaq sumorsuarmut atuuttussamik ajoquserneqassaaq. Soorlu Mexicop Kangerliumanersuarmisut pinavianngiaq, tassani 2010-mi uuliaarluernerujussuup kingunerisaanik pinngortitap piffissap ingerlanerani uulia suujunnaarsissinnaammagu. Issittup imartai immikkut sunnertiasuupput, imaq nillertuummat uumasullu suulluunniit kigaatsuararsuarmik alliartortortarlutik, Jon Burgwald oqarpoq.
– Poltikerit akisussaasut oqaluuserinnittariaqarput iliuuseqarlutillu. Ilumoorsinnaanngilaq atuisartut toqqagassaqassanngippata, qallunaat europamilu politikerit nipaatsumik akuersaaginnaraat issittup uuliaanik biilitsinni atuilissasugut.
Siorna Greenpeace Gazprom-ip Det Arktiske Oceanimi qillerivianut akerliuniarput. Taamanikkut akerliuniat 30-t russinit oqartussaasunit parnaarunneqarput, akerliuniallu qaammatini pingasuni parnaarussaaqqapput, ilaatigut qalluaaq Anne Mie Roer Jensen.
Kalaallit Nunaanni Issittumi uuliamik qillerisoqannginnissaanik Greenpeace-p tapersersortissarsiornerani Save The Arctic-imi, inuit nunarsuarmit tamarmeersut 5 millionit sinnillit atsiorsimapput.