Issittup sikua 2012-mi aatsaat taama sukkatigisumik aakkiartorsimavoq

Nunarsuup silaannartaa 2012-mi ernumanartumik rekordiliivoq, tamanna ukiumoortumik nalunaarusiami marlunngormat tamanut saqqummiunneqartumi takuneqarsinnaavoq.
Issittup sikua 2012-imi septembarimi aatsaat taama annertutigisumik aakkiartorsimavoq, tamannalu peqatigalugu ilisimatuut paasivaat nunarsuup affaani avannarlermi aatsaat taama apinikitsigisimasoq.
Nalunaarusiaq, silap pissusianik ilisimatuunit amerikarmiunit tulunnillu sananeqartoq taaguuteqartorlu Silap Pissusiata Qanoq Issusia ukiumoortumik saqqummiunneqartarpoq.
Atuaruk: "Nanoq silap pissusiata allanngoriartorneranik toqquteqartoq"
Tassani atuarneqarsinnaavoq 2012 ukiut qulit kiannerpaatut uuttorneqarsimasut ilagigaat.
– Nunarsuarmi tamarmi agguaqatigiissitsigutta 2012 ukiut kiannerpaat normu 8-raat 9-raluguluunniit, 1800-ukkut affaanni kingullermi kiassutsimik uuttortaasoqartalermalli.
Aamma gas-inik kissatsinnartunik aniatitsineq nuanniitsumik rekordiliivoq.
– 2012-mi upernaakkut siullermeersumik silaannaap CO2-mik akoqassusiata issittumi uuttortaavinni 13-iusuni arfineq-marlunni 400 ppm qaangerpaat, nalunaarusiami allassimavoq.
Nalunaarusiami isumalluarnartortaavoq Sikuiuitsumi Kujallermi silap pissusia ´aalajaatsuusoq´, tamannalu peqatigalugu silaannaq kissartoq pissutigalugu ozoni ukiuni qulikkaani marlunni minnerpaat tullerisimavaa.