nunarsuup kissatsikkiartornera
Issittup imartaata sikua ukiut tamaasa 94.000 kvadratkilometerinik milleriartarpoq
Ilisimatusarnerup nutaap sikup aakkiartornerata annertussusia takutippaa
Ukiup ilaa, Issittup imartaata sikusimasarfia, 1970-ikkut naalernerannut sanilliullugu qaammammit ataatsimiit qaammatit pingasut angullugit sivikilleriarsimavoq.
Taamatut inerniliisoqarpoq 1978-imiit 2015-imut satellitsikkut paasissutissat tunngavigalugit nutaamik naatsorsuisoqarneratigut, DMI.dk taamatut paasissutissiivoq.
Misissuinermi, DMI-meersumit Rasmus Tonboemit peqataaffigineqartumi, immani tamani sikusimajuaannarneq ajortuni, piffissaq immat sikoqqasarfiannik taaneqartoq misissorneqarsimavoq.
Issittoq tamaat
– Misissuinitta takutippaat piffissaq sikoqqasarfik Issittumi tamangajavimmi sivikillisimasoq. Piffissallu sikoqqasarfiup sivikinnerulerneranut pissutaapput immap sikuata siusinnerusukkut aakkiartortalertarnera, kingusinnerusukkullu sikusaleqqittalernera, Rasmus Tonboe oqarpoq.
Kalaallit Nunaata kitaani Baffinbugtimi piffissaq sikoqqasarfik qaammammik ataatsimiit qaammatinut marlunnut sivikinnerulersimasoq, kujasinnerusumilu Davisstrædimi piffissaq sikoqqasarfik qaammatinik pingasunik sivikinnerulersimalluni.
Pisoq ajorsiartortoq
Piffissaq sikoqqasarfik sivikinnerulermat, akerlianik piffissaq sikoqqasanngittarfik sivisunerulerpoq. Tamannalu namminermini immap sikusarneranik ulorianartorsiortitsivoq, Rasmus Tonboe nassuiaavoq.
– Sikuerukkaangat Seqernup aasap ingerlanerani imaq sivisunerusumik kissassersinnaalertarpaa. Taamaasilluni ukiakkut immap sikujartulertarnera kinguartinneqartarpoq. Immap kingusinnerusukkut sikujartortalernera pissutigalugu immap sikuata ukiukkut issutsikkiartornissaanut piffissaq sivikinnerulerpoq. Upernaraangallu immap sikua saannerusarpoq taamalu nillertigineq ajorluni, tamaasillunilu siusinnerusukkut aserortilertarpoq.