Issittup imartaani qillerineq pillugu Siumumi parteeqatigiit isumaqatigiinngitsut

Inatsisartut siulittaasuat aamma Nunat Avannarliit Killiit Siunnersuisooqatigiivisa siulittaasuata tullia, Siumumeersoq Lars-Emil Johansen, Issittup imartaani qillerilluni uuliasiornermut naaggaarpoq.

Lars-Emil Johansenimi isumaqarpoq kinguaatta atugassaat immeraassutigisarigut Issittup imartaani qillerilluni uuliasiortoqaleraangat.

Taamaammat Lars-Emil Johansen isumaqarpoq maani nunatsinni aamma nunani avannarlerni killerni isumaliutigineqartariaqartoq ataatsimoorluni imaani uuliasiorluni qillerisoqartarneranut naaggaartoqassannginnersoq.

Parteeqataa Issittumi uuliasiorusuttoq
Lars-Emil Johansenip Siumumi parteeqataa, Inatsisartunut ilaasortaq Naalakkersuisooqatigiinnilu kingullermi aatsitassarsiornermut inuussutissarsiornermullu Naalakkersuisoq, Jens-Erik Kirkegaard, Issittup imartaani qullerilluni uuliasiornermut tunngatillugu allamik isumaqarpoq. Nunarput pissusissamisut ineriartussappat, ilimagisaanngitsut ilisimasallu tunngavigalugit ineriartornissaa isumannaatsumik sammiveqartittariaqaripput isumaqarpoq.

- Oqallisissiamik matuminnga parteeqatera Lars-Emil Johansenip uuliasiornissamik naaggaarsimanera illuatungilerpara, anguniakkatsinnimi ataqqinartup Lars-Emil Johansenip issittumi uuliasiortoqarnissaannik naaggaarneratuut allassimasoqanngilaq, Jens-Erik Kirkegaard allappoq.

Kalaallit Nunaanni periarfissaasut ammatinneqartariaqartut Jens-Erik Kirkegaard isumaqarpoq.

- Kalaallit Nunaannullu assingusut aallaaviat tassaasariaqarpoq tunngavissalimmik ilisimasallu tunngavigalugit aalajangiisoqartarnissaa, aningaasaqarnikkut, inunnik isumaginninnikkut avatangiisit innarlitsaaliorneqarnissaannut oqimaaqatigiissumik angusaqaqqulluta, Inatsisartunut ilaasortaq oqarpoq.

Politikki oqimaaqatigiissoq
Atsitassarsiornerup ineriartorneranut apeqqutini sammivik, aatsitassaappata imaluunniit uuliasiornermut gassisiornissamulluunniit tunngappata, taava Issittumi ilisimasanik piviusunik tunngaveqarluinnarluta sunaluunniit ineriartortitsisinnaasut oqimaaqatigiissumik nalilersortariaqaripput Jens-Erik Kirkegaard isumaqarpoq.

- Maanna nunatta Namminersulernerput ilutigalugu aatsitassiornermi oqartussaneq tigunikuuaa, taamaattumik aallartiinnarlutalun immitsinnut naallerarnaveersaarta, illuatungaaniilli kajumissaarutigerusuppara ilimagisat aallaaviginagit taamaattoq ilisimasat tunngavigalugit politikkeqassasugut aningaasaqarnikkut inunnik isumaginnikkut avatangiisikkullu oqimaaqatigiissumik anguniakkatsinni, Kirkegaard oqarpoq.