avatangiisit
Issittup illersorneqarnissaanik piumasaqarlutik 6 millionit atsiorput
Naalagaaffiit Peqatigiit nunarsuaq tamakkerlugu silap pissusiata allanngoriartornera pillugu ataatsimeersuartitsinissaa sioqqullugu Issittup illersorneqarnissaanik piumasaqarlutik atsiornerit 6 millionit Greenpeace-p Ban Ki-moon-imut tunniuppai,
Tallimanngormat Greenpeacep nunani tamalaani generalsekretæriata Kumi Naidoo-p, atsiornerit 6 millionit nunarsuarmit tamarmeersut Naalagaaffiit Peqatigiit generalsekretæriannut Ban Ki-moon-imut New Yorkimi tunniuppai, taamatut Greenpeace tusagassiorfinnut nalunaaruteqarluni paasissutissiivoq.
– Atsiornerit uku tiguvakka siunissamut avatangiisillu illersornissaannik ataatsimut pisussaaffeqarnitsinnut uppernarsaatitut - Issittumiinnaanngitsoq aammattaarli nunarsuarmi tamarmi, Ban Ki-moon tunniussinermi oqarpoq.
Naalagaaffiit Peqatigiit generalsekretæria naapeqatigiinnermi oqarsimavoq Greenpeacep angallataasa arlaannut ilaalluni siunissami qaninnerpaami Issittumut angalarusulluni, Greenpeace oqaluttuarpoq.
Atsiornerit 6 millionit saniatigut Greenlandip aamma Arctic Declaration FN-ip generalsekretærianut tunniuppaa. Allakkiakkut tassuuna immikkoortut qulit atorlugit kajumissaarutigineqarpoq Issittoq illersorneqassasoq, ilaatigut Qalasersuup eqqaani Det Arktiske Oceanimi nunarsuaq tamaat ataatsimut pinngortitamik allanngutsaaliukkamik pilersitsilluni aammalu tamaani uuliamik qillerinerit ulorianaatillit nungusaataasumillu aalisarnerit inerteqqutigalugit.
Arctic Declaration inuit sunniuteqarluartut tunsit tapersersorpaat, ilaatigut nobelip nersornaasiuttagaanik nersornaatisisimasut arfineq-marluk, ærkebiskop Desmond Tutu-p, nipilersortartut Paul McCartney-p aamma Patti Smith-ip, atuakkiortut soorlu Margaret Atwoodip kiisalu NATO-mi generalsekretæriusimasup Javier Solana-p, Greenpeace paasissutissiivoq.