Issittumut umiarsuaq nutaaq
Sakkutuut imarsiortut umiarsuarmik nutaamik sanatitsipput Atlantikup avannaani atorneqartussamik
Skagen-imi Karstensens Skibsværft A/S Sakkutuunik isumaqatigiissummik atsiugaqarpoq. Suliassaq 355 millioner koruuninik naleqarpoq, tamatumuunakkullu illoqarfimmi suliffiit 200-t ukiumi ataatsimi qulakkeerneqarput.
Sakkutuut imarsiortut umiarsuaaqqamut alapernaarsuummut Tulugaq-mut taartissamik nutaaliamik peqalissapput, umiarsuaq alapernaarsuut Knud Rasmussen-itut Ejnar Mikkelsen-itullu ittoq, pitsanngorsagaq amerlanerusunullu atorneqarsinnaasoq.
Taamatut allappoq forsvaret.dk
Umiarsuaq nutaaq 500 millioner koruunit sinnerlugit akeqassaaq. Taavali ´KNUD d.3.´ qamutilimminut 76 mm-imut nutaaliarujussuarmik ildledningssystem-eqassaaq, anginerusumik gummibådeqassalluni kraneqassallunilu, itissusersiummik multibeam sonar-eqarluni, ilisimatusarnermullu atorneqartussanik arlalinnik atortulersorneqassalluni.
Umiarsuaq 2017-imi sanallugu inerpat qallunaat Issittumi ilisimatusarneranni ikiuutaassaaq, naatsorsuutigineqarluni usingiaateqarluni kraneqarlunilu, pisariaqartinneqaleraangat ikkunneqartartussanik.
Umiarsuaq alapernaarsuut 72 meterit missaannik takissuseqassaaq, 14,6 meterinik silissuseqassalluni 5 meterillu missaannik itsinertussuseqassalluni. Umiarsuaq 18-20-nik inuttaqassaaq.
Skagen-imi Karstensens Skibsværft A/S 135 meterinik takissusilimmik amutsiveqartoq Danmarkimi umiarsualiorfiit ikittuinnaat ilagaat suli umiarsuarnik taama angissusilinnik sanasinnaasut. Maannakkorpiaq umiarsualiorfiuæ aalisariutit angisuut tallimat sanavai, umiarsuullu alapernaarsuutip sananissaa pissutigalugu 2016 naanerata tungaanut naammattunik suliassaqarpoq.
Umiarsuaq silaannarmik imaanillu alapernaarsuinermut assigiinngitsunik atortulersorneqassaaq, tamatumalu saniatigut immap naqqata uuttortarnissaanut sonarsystem-eqassalluni. Tassami umiarsuup suliassaasa ilagissavaat Nunatta eqqaani immanik itersisersiuineq. Tamatuma saniatigut umiarsuup assiaquttat puttasut usigisinnaassavai, uuliaarluinermi atorneqartussanik, assersuutigalugu umiarsuarmik ikkarlittoqarnerani.
Atlantikup avannaani umiarsuup suliassai allat soorunami tassaapput alapernaarsuineq, oqartussaassutsimik isumaginninneq, imaani annaassiniarneq, aalisarnermik nakkutilliineq kiisalu Nunatsinni Savalimmiunilu najugalinnut ikiuuttarneq.