Issittumi uuliasiornerup unitsinneqarnissaa EU-mi itigartinneqartoq - ilaatigut

Naalagaaffiit Peqatigiit Issittoq tamakkerlugu uuliasiornerup unitsinneqarnissaanut sulissuteqassanngilaq.

EU-mi inatsisartut ullumi taasinerisa kingorna tamanna paasinarsivoq.

Issittoq pillugu politikkimi sumiiffiit marluk ingammik Kalaallit Nunaannut sunniisussaagaluarput.

Sumiiffiup aappaani allaqqavoq EU-mi inatsisartut 'Ataatsimiititaliarsuup aamma nunani tamalaani ilaasortat naalagaaffiit siunissami issittumi uuliamik gassimillu qalluinissat unitsivissagaat kajumissaarutigineqartoq'.

Sumiiffiullu aappaani 'EU-p nunani tamalaani peqatigisatik suleqatigalugit issittup imartaani qillerinerit taamaatinneqarnissaat anguniartariaqaraat' allaqqavoq.

Taakku sumiiffiit marluk maanna aalajangiinermi itigartitsissutigineqarput.

Inatsisartut illuanik EU-p iluani aamma ataatsimut aningaasaqarnerup (EEA) iluani issittup imartaani unitsitsinissamik suliniuteqartoqarnissaa kajumissaarutigaat. Kingulliup taakkartorneqartup Norge ingammik eqqussavaa, taanna sumiiffimmi aningaasaqarnikkut ataatsimoorussinermi inissisimavoq.

Kisianni taakku sumiiffiit annertunerit marluk itigartitsissutigineqaraluartut, Dansk Folkepartimeersup Jørn Dohrmannip aalajangerneq suli sakkortuumik isornartorsiorpaa.

- Inatsisartut ilaasa Issittoq nuna allanngutsaaliukkatut nammineq ineriartoqqusaanngitsutut isigigaa, aalajangernerup oqariartuutigaa, taanna Sermitsiaq.AG-mut oqarpoq.

EU-p Norge Issittumi uuliasiorunnaartinnialissappagut, taava aamma Kalaallit Nunaat eqqorneqarsinnaasoq ernummatigaa.

Ullumikkut aalajangerneq EU-mi ataatsimiititaliarsuarmut attuumassuteqanngilaq, Jørn Dohrmannillu (DF) ataatsimiititaliarsuup uuliasiorunnaartitsinissaq sulissutiginavianngikkaa nalilerpaa.

- Ullumikkut aalajangernerup pitsaanerpaamik oqaaseqarfigissagaanni, igitassaannaanera oqaatigineqarsinnaavoq, taanna oqarpoq.

Taamatut naliliineq konservativineersup Bendt Bendtsenip isumaqatigaa, taassuma siornatigut Sermitsiaq.AG-mut siunnersuut 'pappilissamik timmisartuaraliatut' oqaatiginikuuaa.

Bendt Bendtsenip gruppini EPP peqatigalugu, immikkut ittumik paragraffit pingasut Issittumi uuliasiorneq pillugu taasissutigineqarnissaat sulissutigisimavaat.

Paragraffit taakku pingasut missingiummi allaqqanngillat, kisianni avatangiisinut ataatsimiititaliami suliarineqarnermini ilanngunneqarput.