Issittumi Upalungaarsimasut siullermeerlutik aggersarneqartut

Siorna Liveximi sungiusarnerinnaavoq. Maanna piviusorsiortoqarpoq; Issittumi Upalungaarsimasut siullermeerlutik aggersarneqarput.

Nuugaatsiami aamma Illorsuarnii pigisanik aallernermut atatillugu tamanna pivoq. Tassa ilaatigut Upalungaarsimanermut aqutsisoqarfimmit sulisut pingasut Nunatsinnukarput, ataaserlu pigisanik aallernermut peqataavoq.

- Sillimaniarnermut nalilersuisorisinnaagatsigu toqqissisimatitsisorujussuuvoq, Jette Elkjær, Issittumi Sakkutooqarfimmi tusagassiornermik sulialik oqarpoq.

Immikkut ilisimasallit
Taanna pineqartoq aalisakkerivimmit ammoniakkimik aniasoqarsimaneranik ulorianartoqarnersoq nalileeqataasimavoq, kiisalu illunut isasimasunut isernissaq isumannaatsuunersoq.

- Umiarsuarnimi upalungaarsuutini inuttat tamatuminnga ilinniarsimanngillat, tassanilu illersornissaqarfiup ilaanit immikkut ilisimasalinnik aggersaanissatsinnut periarfissaqarpugut, Jette Elkjær oqarpoq.

Issittumi Upalungaarsimasut aalajangerlimasuunngillat imaluunniit inuit aalajangersimasuunatik. Taanna aaqqiissutaavoq, immikkut ilisimanik imaluunniit ajutoorujussuartoqarneranut atatillugu ikiortinnissamut pisarisaqartitsisoqarpat, illersornissaqarfiup ilaanit Issittumi Sakkutooqarfimmut ikiortissanit aggersaanissamut periarfissaqartitsisoq.

Inuit pingasut danskit upalungaarsimanermut aqutsisoqarfianeersut uani pineqarput. Upalungaarsimanermut aqutsisoqarfiup ajutoorujussuartoqartillugu suliat annerit, ajunaarnersuit aamma avatangiisinik annertuumik mingutsitsinerit suliassarai.

Sukkasuumik ikiuiartortut
Pigisanik aallernerup saniatigut aamma Nuugaatsiami eqqaanilu avatangiisinik saliinissamut pilersaarusiornermut ilaapput.

Qaasuitsup Kommunia tunngaviusumik pigisanik aamma nunaqarfittaani iluarsaassinermut akisussaasuuvoq. Namminersorlutik Oqartussat imaanut akisussaasuullutik.

- Illersornissamut ministeriaqarfik suliassanut pingasunut ikiunissaanut qinnuigaakka, avatangiisimut pinngortitamullu naalakkersuisoqarfimmi pisortaq, Mette Skarregaard Pedersen oqarpoq, taanna aamma upalungaarsimanermut ataatsimiititaliami siulittaasuuvoq.

Tamatuma kingorna Issittumi Sakkutooqarfiup upalungaarsimasut aggersarpaat.

- Tamanna akuerineqariartoq pingasuullutik timmisartumut ikipput, arfininngormallu tikillutik, Jette Elkjær Issittumi Sakkutooqarfimmeersoq oqarpoq.

Taakku Kalaallit Nunaannik ilisimasaqareerput, tassami Liveximi sungiusarnermut peqataanikuupput.

- Taamaammat ilaatigut suleqatigiinneq pitsaalluinnarpoq, Jette Elkjær oqarpoq.