Issittoq

Issittumi Siunnersuisoqatigiit: Sila pillugu isumaqatigiissut USA-mit qimarratiginiarneqarpa?

USA-p præsidentertaavata Donald Trumpip Nunarsuaq Tamakkerlugu Sila pillugu Isumaqatigiissut Parisimi COP21-p nalaani isumaqatigiissutigineqartoq Issittumi Siunnersuisoqatigiinni atorunnaarsissinnaavaa

Issittumi Siunnersuisoqatigiit aallartitaat - Senior Arctic Officialsinik taaguutillit - aqagut Alaskami marlunngornermi Issittumi Siunnersuisoqatigiit ministerit naapinnissaannut piareersarlutik naapilerunik taamaattumik pissangapput, tassani USA sila pillugu isumaqatigiissummut paasissutissiisariaqarmat.

Parisimi isumaqstigiissut akueriniaraat
Ministerit oqaaseqaatissaannut siunnersuummi allaqqavoq, Issittumi Siunnersuisoqatigiit Parisimi sila pillugu isumaqatigiissut akuerissagaa, tamanna Kinap aamma USA-p præsidenterisimasaata Barack Obamap isumaqataaffigaat.

Kisianni USA-mi præsidentimut qinersisoqarnerata nalaani Donald Trumpip sila pillugu isumaqatigiissummit USA ilaajunnaartariaqartoq oqaatigaa.

Isumaqatigeeqqissaarneq tunngavigalugu sulisoqartarpoq
- Issittumi Siunnersuisoqatigiinni isumaqatigeeqqissaarneq tunngavigalugu sulisoqartarpoq, tamannalu ima paasineqassaaq peqataasut tamarmik ministerit oqaaseqaataannut isumaqataasariaqartut. Silap Allanngoriartornera pillugu Isumaqatigiissummit USA tapersersuiunnaassappat qanoq pisoqarnissaa nalulluinnarpara. Taama pisoqassappat Issittumi Siunnersuisoqatigiinni siunissami suleqatigiinnissaq innarlerneqariaannaavoq, tassanilu pivakka naalagaaffiit akornanni, taamatullu Ataavartumik Peqataasutut taaneqartartut, tassaasut Issittumi nunat inoqqaavisa kattuffiisa akornanni. Pissanganaqateqanngilaq, Hjalmar Dahl aallanngitsiarnermini oqarpoq.

Maajimi ministerit naapissasut
Issittumi Siunnersuisoqatigiit ministerii maajip 11-anni Faibanksimi Alaskami ataatsimiissapput.

USA, Canada, Rusland, Norge, Sverige, Finland, Kunngeqarfik Danmark aamma Island Issittumi Siunnersuisoqatigiinni ilaasortaapput. Nunat inoqqaavisa kattuffii tallimat peqatigalugit ICC Issittumi Siunnersuisoqatigiinni ataavartumik peqataasuupput.

Powered by Labrador CMS