Siunnersuisooqatigiit
Issittumi Siunnersuisooqatigiit ataatsimiinneranni Kalaallit Nunaat peqataanissaminut piareersimavoq
Issittumi Siunnersuisooqatigiinni ministerit Nunavumi Iqalunni ataatsimiissapput. Ukrainemi aaqqiagiinngittoqarnera eqqartorneqartorujussuusussaavoq. Aamma suliniutigineqartussanik Kalaallit Nunaat siunnersuuteqarpoq
Issittumi Siunnersuisooqatigiit 2013-mi maajimi ingerlanneqartumi Naalakkersuisunut siulittaasuusimasup Aleqa Hammondip peqataajumannginnera eqqaamaneqajunnarsivoq.
Issittumi Siunnersuisooqatigiit ataatsimeeqqilerput. Ataatsimiinneq Iqalunni Nunavummi ingerlanneqassaaq tallimanngorpat.
Tassani Inuussutissarsiornermut, Suliffeqarnermut, Niuernermut Nunanullu Allanut Naalakkersuisoq Vittus Qujaukitsoq peqataassaaq.
Ministerit, ilanngullugu Inuussutissarsiornermut, Suliffeqarnermut, Niuernermut Nunanullu Allanut Naalakkersuisoq, Issittumi Siunnersuisooqatigiit ukiuni aggersuni marlunni amerikamiut siulittaasoqarfiuneranni pingaartitassaat isummerfigissavaat, taamatullu Canadamiut siulittaasoqarfiat siulittaasoqarfiujunnaaqqammersoq, aammalu siulittaasoqarfiunerisa nalaanni suliniutaasimasut nalilersorneqassallutik.
Naalakkersuisunit pingaartinneqartut
Ataatsimiinnermi siulittaasoqarfik Canadamiit USA-mut, ukiut tulliuttut marluk siulittaasuusussamut, tunniunneqassaaq. Ministerit nalunaarutaat kiisalu nalunaarusiaq taaneqartartoq Senior Arctic Officials, ataatsimiinnermi akuersissuteqarfigineqassapput. Allakkiat marluk taakkua ilaatigut ukiunut tulliuttunut suliaqarnermut pilersaarutinik imaqarput.
Sammisassat Naalakkersuisut tungaanniit ukiuni tulliuttuni aallunneqarumasut ilaatigut tassaapput imaani sumiiffiit, avatangiisit, silap pissusaata allanngorneri, eqqarsartaatsikkut peqqissuseq, Naalakkersuisut tusagassiutinut nalunaarutaanni atuarneqarsinnaavoq.
Iqalunni ataatsimiinneq tallimanngorpat aallartinneqarpat Ruslandip Ukrainellu aaqqiagiinnginnerat sammineqangaatsiassasoq nutaarsiassaqartitsivik Ritzau allappoq.
- Ruslandip Ukrainimut sakkortusaarnera pillugu Canada Ruslandimut isornartorsiuiniarpoq, Canadap nunanut allanut ministeria Leona Aglukkaq oqarpoq.
Issittumi Siunnersuisooqatigiit ataatsimiinnerat pillugu annertunerusumik Sermitsiami aqagu tallimanngornermi saqqummertussami atuarneqarsinnaavoq