Issittumi SAR-imik upalungaarsimaneq nersualaarneqartoq

Alutornarluinnarpoq takullugu canadamiut kigaallassaaserlutik annaassiniartartut issittumi annaassiniarnermik immikkut sungiusarsimasut timmisartumit Hercules-imit pissigartut, tamanna peqatigalugu annaassiniartartut, nakorsat, politiit nunanillu allanit arlalinnit annaassiniartartoqatigiit Ella Ø-p eqqaani umiarsuarmit takornariartaammi ´umiusimasumi´ ´Arctic Victory´-mi issimasut 252-it annaanniarlugit ulapittut.
Tunulli avannaani Kong Oscar Fjordimi ujaasinermik annaassiniarnermillu sungiusarnersuaq ´Sarex Greenland Sea 2013´ sungiusarnerinnaagaluartoq tamassuma takutippaa nunat tamalaat atituumik suleqatigiinnerat qanoq kinguneqarsinnaasoq.
Taamatut erseqqissaavoq Naalakkersuisut siulittaasuat Aleqa Hammond, Siumut, ´ajunaarfissuaq´ takuniaramiuk.
– Sungiusarnerup kusanartumik takutippaa peqatigiittugut Issittumilu SAR-imik upalungaarsimaneq eqqarsaatigalugu nunanik sanilitsinnik Issittumilu Siunnersuisoqatigiinni ilaasortanik suleqatiginnissinnaasugut. Tamanna tamatta tulluusimaarutigissavarput, Aleqa Hammond Sermitsiaq.AG-p aallartitaanut oqaaseqarnermini oqarpoq.
Pingasunngormat Ella Ø-mi persuarsiutaanngitsumik oqalugiatsiarpoq, tassani ilatigut najuullutik Issittumi Sakkutooqarfiup pisortaa general Stig Østergaard Nielsen, nunanillu peqataasunit arlalinnit, nunami allanngutsaaliukkami inuilaamiittumi SAR-imik sungiusarnissamut qaaqquneqarsimasunit, aallartitat.
Atuaruk: "Aleqa Hammondip Sarex-imik sungiusarneq takuniarpaa"
Issittumi Siunnersuisoqatigiinni isumaqatigiissut 2011-meersoq
Takuniaasut aamma ilagaat Danmarkip Issittumi ambassadøria nutaaq Erik Vilstrup Lorenzen.
Taassuma erseqqissarpaa sungiusarneq Nuummi nalunaarutip toqqaannartumik kingunerigaa, 2011-mi Issittumi Siunnersuisoqatigiinni ilaasortat Nuummi isumaqatigiissutigisaata.
– Matumani nammineq isitsinnik takusinnaavarput SAR-imik suleqatigiinneq qanoq ingerlalluartigisoq. Suliassaq taama annertutigisoq, assersuutigalugu Issittumi umiarsuarmik takornariartaammik ajutoortoqassappat, nunat tamalaat suleqatigiittariaqarput, tassa nunap ataasiinnaap ajunaarnersuaq kisimiilluni sapissammagu, Erik Vilstrup Lorenzen erseqqissaavoq, taannalu ukiuni sisamani Danmarkimut Canadami ambassadørioreersimalluni aggustip aallaqqaataani Danmarkip Issittumi ambassadørerilerpaa.
Kangilinnguani Sakkutooqarfiup aqqa Issittumi Sakkutooqarfimmut allanngortinneqarsimagaluartoq sakkutooqarfiup sungiusarnissaq suliniutigisimavaa sungiusarnissarlu pilersaarusiorsimallugu. Sungiusarnermik aqutsisuuvoq Exercise Director kommandørilu Karsten Riis Andersen, tassa Issittumi Sakkutooqarfik sungiusarnermi nammineq peqataammat.
Canada 2014-imi aaqqissuisuussava?
Sermitsiaq.AG-p paasisai malillugit qularnanngilaq aappaagu Canada ujaasinermik annaassiniarnermillu sungiusarnermik aaqqissuussisuussasoq, immikkoortut tamarmik inissinneqarsimanngikkaluartut.
´Sarex Greenland Sea 2012´ aamma ´Sarex Greenland Sea 2013´, tallimanngormat Mestersvigimi naliliinermik naammassineqartoq, Tunup avannaani Nunami allanngutsaaliukkami Kong Oscar Fjordimi Ella Ø-p eqqaani ingerlanneqarsimapput.
Sermitsiaq.AG ulluni aggersuni sungiusarnermit allaaserisaqarlunilu assinik ilanngussisassaaq, tamanna teknikkikkut ajornanngikkaangat.
Sarex 2013-imit allaaserisat tamaasa atuakkit