Upernavik

Issittumi Sakkutooqarfiup ilaasut ingerlaqqinnaveertut ikiorpai

Upernaviup eqqaani innuttaasut angalanerminni ingerlaqqinnaveertut, juullikkunnili angerlarsinnaasimanngitsut maanna Issittumi Sakkutooqarfimmit ikiorneqalerput.

S-61, Sikorsky, Air Greenland

Qulimiguulik angisooq S-61, Kangerlussuarmi SAR-imi upalungaarsimanermut ilaasoq Upernavimmukarpoq, tassani Air Greenlandip ilaasuisa angalatinnissaannut ikiuutissalluni.

- Air Greenlandip saaffiginninnerata kingorna qulimiguullip S-61-ip Kangerlussuarmit Upernavimmut nuunneqarnissaa akueraarput, tassani Upernaviup eqqaani angallassinermut tapertaassaaq, Jette Elkjær, Issittumi Sakkutooqarfimmi tusagassiornermut siunnersorti ilisimatitsivoq.

SAR-imik suliaqarnissamut suli salliutitsisoqartoq taassuma naqissuserpaa, kisianni qulimiguullip annaassiniarnermut sulianut ilaannginnerani aqagumiit januaarip 19-at ilanngullugu ilaasorpassuarnut ingerlaqqinnaveertunut ikiuinermut atorneqarsinnaasoq oqaatigaa.

Silarlunerata aamma Air Greenlandip qulimiguuliutaasa teknikkikkut ajoquteqarnerisa silallu taarnera innuttaasut juullikkunnili Upernaviup eqqaani apuuffissaminnut apuussimannginnerannut pissutaapput.

S-61-ip qulimiguullip Air Greenlandip qulimiguullit atugaannit ilaasut amerlanerusut ilaasorisinnaavai.

- Issittumi Sakkutooqarfiup S61-ip uani pisumi immikkut ittumi atorneqarsinnaanera akueraa, Angallannermut, Ineqarnermut aamma Sanaartornermut Aqutsisoqarfik Upernaviup eqqaani ilaasunik timmisartuussinissamik akuersissummik tunniussinikuuvoq. Taamaammat Issittumi Sakkutooqarfiup ikiuukkumaneranut qujavugut, Air Greenlandimi niuernermut pisortaq, Maliina Abelsen oqarpoq.

- Silassamut ilimasaarut atuutiinnassappat aamma maanna qaamanerani ilaasut 70-t ullumi apuutissavagut. S61 19-nik ilaasoqarsinnammat pisunut makkununnga iluaqutaalluarpoq, ilaasummi amerlasuut taamaatitsiinnarnernut eqqorneqarput, Maliina Abelsen nangippoq.

Pilersaarut malillugu S-61 nal. 11.30 Upernavimmut tikissaaq, timmisartuussinerlu siulleq Kullorsuarmut 11.50 pilersaarutigineqarpoq.

Powered by Labrador CMS