Ajunaarnersuarmi eqqugaasut

Issittumi Sakkutooqarfik pigisanik aallerniartoq

Illorsuarni Nuugaatsiamilu qimangussorneqarsimasut pigisatik erlinnarnerpaat massakkut aatissinnaalerpaat.

Kalaallisuut, aallaasit assilluunniit.

Tamakkuuppuut Illorsuarni Nuugaatsiamilu innuttaasut tigoqqissinnaasaat.

Illersornissamummi Ministereqarfik Qaasuitsup Kommunianut ikiuukkusulluni nalunaaruteqaqqammerpoq.

Namminersorlutik Oqartussat tusagassiuutinut nalunaarummi allapput.

Pigisanik aallertoqarnissaanut ajornartorsiut tassaavoq qaqqaq nakkaateriaannaassoq aarlerinassusaataa qaffasinnerpaamiittutut nalilerneqarsimanera.

Tamanna pissutigalugu inuit nammineerlutik pigisaminnik aallernissaat navianarpallaarsorineqarpoq.

Nakkaatilissangaluarpammi, minutsit arfineq pingasut Nuugaatsiami isumannaatsumukarnissamut periarfissatuaapput, Illorsuarnilu minutsit aqqaneq marluk.

Suliarlu tamanna Issittumi Sakkutooqarfimmut kommunimilu upalungaarsimasuutitanut aamma ulorianassaaq.

- Suli qaqqap sisooqqinnissaa ulorianartorsiorfiuvoq, illut ilaat immamut amuneqarsimapput aammalu illut nunamiittut ilaat annertuumik ajoqusersimallutik. Tamanna pissutigalugu suliassaq, Sakkutooqarfiup aamma kommunimi upalungaarsimasut ikiuuffigissallugu misilitassaat isumannaallisaanikkut ajornakusoortuuvoq, tusagassiuutinut nalunaarummi allassimasoqarpoq.

Tamannalu patsisigalugu innuttaasut pigisatik tamaasa aasinnaanngilaat, kisiannili erligilluinnakkatik kisiisa.

- Qaqqap sisooqqissinnaaneranut ulorianartorsiorneq peqqutigalugu aamma inuit namminneerlutik pigisaat, siullermik aallerluni misiliinermi sukkasuumik tiguneqarsinnaasut tassaapput innuttaasunut immikkut naleqartutut naliliiffigineqartut. Tassaasinnaapput kalaallisuut, pinnersaatit, sakkut, assit assigisaallu, Namminersorlutik Oqartussat allapput.

Tamarmilli aaneqarsinnaaneri qularnarpoq.

- Suliap ingerlanera tamakkerlugu inuit suliaqartussat isumannaallisaaneq eqqarsaatigalugu ulorianartorsiunnginnissaat pingaarnerpaatinneqassaaq. Taamaattumik innuttaasut eqqugaasut tamakkerlutik ikiorneqarsinnaanissaat qulakkeerneqarsinnaanngilaq, kisiannili misiliisoqassaaq, tusagassiuutinut nalunaarummi allassimasoqarpoq.

Nuugaatsiami illut arlallit imaanut amuneqarsimapput. Allallu malissuup inigisaanit nikisissimallugit. Taamaammat illut kikkunnit pigineqarnersut paasiumallugu najukkami kommunefogedi peqataatinneqassaaq.

Kommunimi upalaungaarsimasuutitat aqutsisuat suliami aammattaaq peqataassaaq.

Pinngortitami ajunaarnersuup kingorna saliinissaq Qaasuitsup Kommuniata aamma Namminersorlutik Oqartussat akisussaaffigaat.

- Tamanna tunngavigalugu Illersornissamut Ministereqarfiup ajunaarnersuup pereernerani suliniuteqarnerup kingorna suliassanut ikiuunnerminik ingerlatitseqqinnissaa immikkut nuannaarutissaavoq annertuumillu iluaqutaasussaalluni,.

Kommuni massakkut nunaqarfinni innuttaasut upalungaarsimasuutitat Issittumilu Sakkutooqarfimmiut illuinut isersinnaanerinut akuersissummik pinialeruttorput.

Powered by Labrador CMS