piumasaqaatit
Issittumi piumasaqaateqarniarnermut tunngavigineqartut Greenpeacemit aarlerineqarput
Qalasersuaq uuliasiorfissatut isiginagu illersorneqartussatulli Danmarkimit isigineqartariaqartoq Greenpeacemit neriuutigineqarpoq
Kunngeqarfiup Danmarkip Qalasersuarmik oqartussaaffigerusutamik piumasaqaataa nassiunneqartussaavoq FN-imut ataasinngornermi. Danmarkimi naalakkersuisut Qalasersuup illersorneqarnissaa anguniassagaat Greenpeacemit oqariartuutigineqapoq.
- Oqartussaaffigineqalerusuttup ilarujussua piviusunngussappat apeqqutaaginnalissaaq Danmarkip qanoq iliuuseqarfiginiarneraa.
- Siunissamut Qalasersuup illersorneqarluarnissaa akissutaasariaqarpoq, nunarsuatsinnimi assingusumik Qalasersuaqanngilaq, Greenpeacemit Jon Burgwald tusagassiutinut nalunaaruteqarpoq.
Danmarki nunani siullersaalluni FN-imut nassiussissaaq Qalasersuarmik oqartussaaffeqalernissamut annertuumut qinnuteqaateqarluni ataasinngornermi. Qalasersuup imartaata naqqata 895.000 kvadratkilometeriusumik oqartussaassuseqarnissamik qinnuteqaateqassaaq. Ruslandip 200 sømilia tikillugu qinnuteqaateqartoqassaaq.
Greanpeacemiilli ernumagineqarpoq Danmarki Kalaallit Nunaallu siunissami Qalasersuup imartaata naqqani piiaalernissaa.
- Qalasersuarmi oqartussaaffinnik annertunerpaanniuunneq isumartaqarnanilu isumaatsuuvoq. Periarfissanik ujarlerneruvoq. Nunap pissarititaanik piiaanissamut periarfissaqarnera Qalasersuaq pilerngunneqarpoq. Eqqartorneqartumili sikuerukkiartorpoq, Jon Burgwald oqarpoq.
- Qalasersuup illersorneqarnissaa pingaartinneqartariaqarpoq. Qalasersuup imartaata naqqani uuliaqarnersoq gasseqarnersorluunniit misissorneqarusuppoq, nunarsuatsinnili sikut aakkiartorneri taakkunannga pilersitaapput. Taamaattumik Qalasersuartut ittunik aatsaat taama illersuisoqarnissaa pisariaqartigaaq, Jon Burgwald oqarpoq.