Skip to main content

Issittumi naalagaaffiit maajimi Ilulissani ataatsimeersuassapput

Danmark aamma Kalaallit Nunaani maajimi Issittumi ataatsimeersuarnermut qaaqqusisuussapput, tassani Ilulissani 2008-mi nalunaarutip ukiut qulinngortorsiorlugu nalliussitinniarpaat, tassani issittumi naalagaaffinnit arfineq-pingasunit ministerit aamma aallartitat ataatsimeersuarnermut peqataassapput.

Ataatsimeersuarneq ulluni maajip 22-anni aamma 23-anni pissaaq, Ilulissani nalunaarutip akuerineqarnerata ukiuni qulinngortorsiornera malunnartinneqassalluni.

Danskit nunanut allanut ministeriat Anders Samuelsen aamma Nunatsinni nunanut allanut naalakkersuisunngortussaq ataatsimeersuarnermi qaaqqusisuussapput, tassani issittumi naalagaaffiit arfineq-pingasuusunit ministerit aamma aallartitat kiisalu issittumi nunap inoqqaavi peqataassapput.

- Ilulissani nalunaarummi maajip 2008-meersumit Issittumi naalagaaffiit sineriallit tallimaasut Issittup eqqissisimaffiunissaanut pisussaaffeqalerput, akerleriissutigineqarsinnaasut eqqissisimasumik isumaqatiginninniarnikkut nunat tamalaat maleruagassaat naapertorlugit aaqqiivigineqartarlutik, tassanilu aamma piujuartitsinikkut aningaasaqarnikkut ineriartortitsineq, avatangiisinik illersuineq aamma ilisimatusarneq suleqatigiissutigineqarlutik, Udenrigsministeriet tusagassiuutinut nalunaarummi allappoq.

Issittumi naalagaaffiit arfineq-pingasunit Ilulissani ataatsimeersuartoqarnerani ministerit aamma aallartitat, issittumilu nunap inoqqaavisa Ilulissani nalunaarutip kinguneri aamma Issittumi suleqatigiinnermi isiginniffiit assigiinngitsut oqaluuserissavaat. Taamatullu aamma Issittumi Siunnersuisoqatigiiffiup ilisimatusarnikkut sulineq pillugu ataatsimiittoqassalluni.

Tamatuma saniatigut aamma ataatsimeersuarnermi peqataasut Ilulissat Kangerluatigut nunaqarfimmut Ilimanamut paasisassarsiorlutik angalassapput, tassani najukkami takornarissat pinngortitarsuarmik misigisaqarfigisinnaasaannik illuaraliornikkut aningaasaqarnikkut ineriartortitsisoqarnikuuvoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER