Issittumi ministereqalernissaa Liberal Alliancemit ammaffigineqarpoq
Issittoq pillugu akisussaasumik ministereqalernissaa Folketingimi oqaluuserineqarpoq. Tassunga ministeriliortoqarnissaa soqutigineqarpoq
Issittup soqutigineqaleraluttuinnarnera ilutigalugu danskit Issittumi ministeriaqarfimmik pilersitsisoqarnissaa isumaliutersuugitineqarpoq. Issittoq pillugu Folketingingi nalunaajaasoqarnerani oqaluuserineqarpoq.
Issittumi ministerimik pilersitsisoqarnissaa Liberal Alliancemit ammaffigineqarpoq.
- 2016-mi danskit ministerinik pilersitsinerannit isumaliutigineqarpoq Issittumi suleqatigiinnermut ministereqalernissaata pilersinneqarnissaa soqutigineqarmat. Tamanna Naalagaaffeqatigiinnermut iluaqutaassaaq, tassami maanna nunat avannarlernut suleqatigiinnermut ministereqartoqareerpoq, Liberal Alliancep oqaaseqartartua Carsten Bach oqarpoq.
- Nunanut allanut ministeriup nalunaajaataa una immaqa kingulliusinnaavoq. Imaassinnaasormi aappaagu qinersisoqareerpat Issittumut ministerimik toqqaasoqartoq.
Issittoq pillugu ministeqalernissaa Inuit Ataqatigiinnit qaqinneqareerpoq. Partiip folketingimi ilaasortaatitaata oqallinnermi aamma tamanna qaqippaa.
- Oqaaseqartup isummersuutai soqutiginarput. Tassungami immikkoortumut ministereqalernissaa soqutiginartorujussuuvoq. Issittumi ministereqalernissaa siunnersuutigereernikuuarput siornatigut, Aaja Chemnitz Larsen oqarpoq.
Carsten Bach aperineqarpoq ilumut Liberal Alliancep sulissutigiumaneraa Issittumi ministereqalernissaa. Partiip tamanna siunnertarineraa toqqaannartumik oqaaseqarfigerusunngilaa.