The Polar arctic marathon

Issittumi maratonertitsisoqarnerani europamiut angusarissaarluartut

Kangerlussuarmi aqqanilissaa maratornersitsisoqarlunilu maratonip affaanik arpatitsisoqarpoq

Kangerlussuarmi The Polar Arctic Marathonimi arpallutik aallartilersut

The Polar Circle Marathon Kangerlussuarmi aqqanilissaa akunnerup naanerani ingerlanneqarpoq.

Sermersuarminngaannit arpattut aallartinneqartarput Kangerlussuullu avannaata tungaani apuuttarlutik.

Aaqqissuisut, Albatros Travel, nutaamik ukioq manna aaqqissuussisimapput, 'Polar Bear Challenge'-mi aamma peqataasinnaalersoqarluni. Maratonimi maratonillu affaani arpaqataasut ujaminnatsinneqartarlutik. Maratonip affaanik arpattoqarpoq arfininngornermi, maratonertoqarlunilu sapaammi. Taakkunani marlunni peqataasut 'Polar Bear Medal'-imik ujaminnatsinneqarput.

Nunani assigiinngitsuneersut ukioq manna peqataaqqipput.

Norbert Zeppitz Østrigimeersoq maratonimi ajugaavoq akunnerit pingasut minutsit 30-t sekundillu arfineq pingasut atorlugit. Qallunaaq Nicolai Holm Kjølbæk aappaattut inissippoq minutsini arfineq pingasuni kigaannerulluni. Angutit 92-t maratoneqataapput.

Arnani belgiamiu ajugaasoq
Arnani Debby Urkens Belgiameersoq maratonimi ajugaavoq, akunnerit sisamat, minutsit aqqanillit sekundillu 26-t arpallugit. Frankrigimeersoq Saskia Plaucheur Plaucheur aappaattut inissippoq minutsini qulingiluani ajugaasumit kigaannerulluni. Arnat 28-t maratoneqataapput.

Angutit 62-t maratonip affaa arpappaat. Spaniamiu Angel Pavon Guerra ajugaavoq, akunneq ataaseq minutsit 54-it sekundillu 23-t atorlugit. Nunatsinnit Anguteeraq Karl-Kristian Christensen tallimaattut inissippoq.

Arnani maratonip affaani Saskia Plaucheur Plaucheur ajugaavoq akunnerit marluk, minutsit 38-t atorlugit. Arnat 35-t maratonip affaanik arpaqataapput.

Polar Bear Challenge-mi kiniiseq Rengui Cai angutini angusarissaarneqarpaavoq, arnani Frankrigimit Saskia Plaucheur Plaucheur angusarissaarnerpaalluni. Arpattut 57-t 'Polar Bear Medal'-imik ujaminnapput.

Angusat tamarmik uani takuneqarsinnaapput

Powered by Labrador CMS