issittup oqaluttuassartaa
Issittumi ilisimasassarsiornermi inuttortarsimasut
Ilisimatusaammi nutaami Canadap issittortaani ilisimasassarsioriat ajutoornermit nalaanneqartut immikkut ittumik inuttortarsimanerat ilimanarsisinneqarpoq
Ilisimasassarsiornermi 1845-mi aallartittumi Canadap issittortaa aqqusaarlugu Kangianut imaatigut aqqummik nassaarniarnissaq pilersaarutaasimavoq. Ilisimasassarsiornermut siuttuuvoq tulut sakkutuut imarsiortut naalagaat ilisimasassarsiortartorlu John Franklin, umiarsuarnik taqussersorluarsimasunik marlunnik atugassaqartoq.
Ilisimasassarsiortulli ajutoornernit eqqugaapput ukiunilu arlalinni Issittumi nikinnaveeqqallutik, Videnskab.dk-lu LiveSciencemi allaaserisamik issuagaqartoq naapertorlugu, ilisimasassarsioriat annassinnaajumallutik inuttortariaqarsimanerat sivisuumik ilisimaneqarsimavoq.
Maannalu misissuinermi nutaami ilimanarsisinneqarpoq umiartortut kaattut ikinngutimik toqusut neqaannik avissiinnartarsimanngitsut. Saarnginik aamma ammaasarsimapput patiinik milluaasinnaajumallutik.
Misissuinermi nutaami Journal of Osteoarchaeologymi tamanut saqqummiunneqartumi ilisimatusartut ilisimasassarsiortut saarnginik 35-nik misissuisimapput. Taakkunani saarngit uunneqariarlutik patii milluarsinnaajumallugit aserorneqartarsimanerannut takussutissanik nassaarput.
Franklinip ilisimasassarsiornerata alianartumik naggateqarsimanera paaseqqaaramikku tuluit tupassimagaluaqisut ilisimatooq LiveSciencemut erseqqissaalluni oqarpoq, angutit qanoq ilungersunartorsiortigisimanerat nassaanit nutaanit takutinneqartoq.
Ilisimasassarsioriat ilarpaalussui umiarsuarmi toqusimapput, allallu umiarsuarmit sikkussaaqqasumit pisuinnaq qimaaniarsimagaluarlutik, annattortaqarsimanatilli.