Issittumi ilisimasassarsiorluni angalanermi nunatsinnit marluk peqataassapput

(Nalunaaqutaq 11.51 allaaserisaq Nivi Bak Hansenip assinga ilanngullugu nutarterneqarpoq)

18-inik ukiulik Malu Ostermann aamma 19-inik ukiulik Nivi Bak Hansen tamarmik Sisimiuneersut, amerlanernit misigisaqarfiunerusumik aasaanerani atuanngiffeqassapput. Ullumi tallimanngornermi Canadamut aallassapput, ukiumoortumik ilisimasassarsiorluni angalanermi Students On Ice-mi, ataasinngorpat aallartittussami, peqataassallutik.

Malu Ostermann WWF Verdensnaturfondenip legatianik, ukiumoortumik kalaallimut ilinniagaqartumut tunniuttagaanik tunineqartussatut toqqarneqarpoq, taamalu angalanermi peqataasinnaalerluni. Nivi Bak Hansen Tasiilameersoq, maanna Sisimiuni GUX-mi ilinniartoq, Oceans Northimit aningaasaliiffigineqarpoq.

Ilinniagaqartut nunarsuarmit tamarmeersut 100-t sinnillit ukioq manna angalanerat aallartissaaq canadami illoqarfiit pingaarnersaannit Ottawamit. Tassanngaannit nunatsinni Kangerlussuarmut timmisartuunneqassapput, tassanilu umiarsuarmut utaqqisumut ikillutik sinersussapput, ilaatigut Itilleq, Ilulissat Uummannarlu tikissallugit.

Tamatuma kingorna Davisstrædet ikaassavaat, ilinniagaqartut Sullualuup paavani angalaassallutik ilaatigut tikeraassallugit Pond Inlet, Sirmilik Nationalpark aamma Beechey Island, angalanerlu Resolute Baymi naassaaq.

Atuaruk: Students on Ice-mik angalanissami kalaallimik peqataasussamik ujarlertoqarpoq

Nunarput sinnerlugu peqataanissani qilanaaraa

– Kalaallit Nunaat sinnerlugu peqataanissara qilanaaraara, Malu Ostermann oqarpoq.

– Inunnillu nutaanik naapitsinissara nutaanillu misigisaqarnissara qilanaaraakka. Isumaqarpunga misigisaq annerpaaq tassaassasoq Uummannamit Canadamut ikaarnissarput, taanna oqarpoq erseqqissaatigalugulu Kalaallit Nunaanni Canadamilu pinngortitat alinaatsut misigisaqarfiginissai qilanaaralugu.

Kiisalu Malu Ostermann isumaqarpoq Kalaallit Nunaat sinnerlugu suliassaq nuannersuusoq. Tamanna misigereersimavaa Islandimi peqqinnissaq pillugu aalanerusarnissamillu isumasioqatigiinnermut atatillugu.

Sammineqartussat

Ilisimatusarnissami sammineqartussat tassaapput silap pissusiata allanngoriartornera, pinngortitamik ilisimasatoqqat, kitaamiut piareersarnerat issittumullu tunngasut pingaarutillit allat, misigisassarsiornermili pingaarnersaavoq inuusuttut namminneq timimikkut issittoq misigisaqarfigissagaat.

Pinngortitarlu silalllu pissusia Malu Ostermannimut pingaaruteqarput, taanna oqaluttuarpoq:

– Isumaqarpunga pinngortitaq silallu pissusia soqutiginartorujussuusut, pinngortitatsinnilu qanoq pisoqarnera malinnaaffigaara. Isumaqarpunga nunarsuarmi qanoq pisoqarnera soqutiginartorujussuusoq, malinnaarusuppungalu. Isumaqarpunga pinngortitatta kusanartup paarinissaa pingaaruteqartoq, allamimmi assingusoqanngilaq.

WWF Verdensnaturfondenip kalaallit ilinniagaqartut ilisimasassarsiornermi peqataanissaat akiliuttarsimavaa. Canadami WWF-ip taamatuttaaq ilinniagaqartut Nunavummeersut akiliuttarpai.

Ukioq manna ilisimatusarneq malinnaaffigisinnaavat uani studentsonice.com, tassani ilinniagaqartut angalaneq oqaluttuarisassallugu misigisaaminnillu assinik videolianillu ilanngussisassallutik.

Allaaserisaq ilanngunneqarpoq WWF Verdensnaturfondenip Sermitsiaq.AG-llu suleqatigiinnerisigut

Allaaserisap ataani Malu Ostermannip aamma Nivi Bak Hansenip assingi takukkit