KL

DK

Issittumi filmiliornissamut periarfissaq malunnaatilimmik nukittorsarneqarpoq

Nunat tamalaat issittumi nunat inoqqaavisa filmiliornermut aningaasaateqarfiat pilersinneqarpoq

Filmiliornermut aningaasaateqarfiup saqqummiunneqarnera. Assimi takuneqarsinnaapput Pipaluk K. Jørgensen (FILM.GL), Valerie Creighton (Canada Media Fund), Sardana Savvina (Archy, Yakutia), Anne Lajla Utsi (), Huw Eirug (Nunavut Film Development Corporation) aamma Liisa Holmberg (International Sámi Film Institute). International Sámi Film Institute
Walter Turnowky

Saamit, Ruslandimi Yakutiamit, Nunavumit imaluunniit Kalaallit Nunaannit oqaluttuanik oqaluttuartoqassatillugu, periarfissaq malunnaatilimmik nukittorsarneqarpoq.

Kautokeinomi Indigenous Film Conferencemut atatillugu illuatungeriit tallimat ataatsimoorlutik Arctic Indigenous Film Fund pilerseqqammerpaat. Screendaily taama allaaserisaqarpoq.

FILM.GL taakkununnga peqataavoq, ataatsimiinnermilu Pipaluk K. Jørgensen taanna sinnerlugu peqataavoq. Tamatuma saniatigut aningaasaateqarfik Canada Media Fundimit, Nunavut Film Development Corporation in Canadamit aamma Archy Film Associationimit Yakutiami, Ruslandimeersumit tapiiffigineqarpoq.

Nunap inoqqaavisa oqaasiinik, piorsarsimassusaannik aamma inuiaqatigiinnik nukittorsaasunik filmiliornerit taperneqartarnissaat siunertaavoq.

Aningaasaateqarfik 2019-imi 40 millionit koruuninik missingersuuteqarluni aallartissaaq, pilersaarut malillugu 2021-mi 160 millionit koruuninut qaffassalluni.

Kautkeinomi festivalertoqarnerani ilitsersuisartoq David Lynch inuulluaqqussuteqarpoq, aningaasaateqarfimmullu tapersiinini oqaatigalugu.

kulturi
Powered by Labrador CMS