mianersoqqusineq
Issittumi aningaasarsiornissaq ajornartoq
Danmark Kalaallit Nunaallu issittumi aningaasarsiorsinnaanerat killeqaleriartuinnarpoq naak aningaasarsiorsinnaaneq qaffakkiartoraluartoq
Aningaasatigut issittumi isaatitsisoqarsinnaalluaraluarpoq. Aatsitassatigut, umiarsuit ingerlafiitigut takornarianillu aningaasarsiorfiusinnaagaluarluni. Norge, Canada Ruslandilu periarfissaasunut ingerlalluarlereerput, Danmark Kalaallit Nunaallu periarfissanik atorluaanngitsut Politikenimi allaaserineqarpoq. Polariis Londonimi allaffeqartoq issittumi ineriartortitsineq pillugu suliaqartut taama naliliipput.
Suliffeqarfiup inaarutaasumik nalunaarusiamini naammassingajalersumi siunissamut missingersuivoq ukiuni tulliuttuni 20-ni issittumi aningaasarsiorneq 3.200 milliard koruuniniit 2015-imi 10.000 milliard koruuninik qaffakkumaartut.
Mikå Meredip erseqqissaatigaa Danmark Kalaallit Nunaallu namminersorneq pissutigalugu Oslo-mit Quebec-imit Moskvamiillu sulinerat ilungersunarnerusoq. Namminersornerunermit namminersulernermut ikaarsaarnermi ataqatigiissumik suli ingerlasoqanngitsoq taallugu.
Namminersulernermi Kalaallit Nunaata aatsitassat pillugit angerlaassaqarsimanera aamma pissutaasunut ilaanerarlugu.
- Kalaallit Nunaat ukiuni kingullerni namminersornermi aqutsinermini paasiartulerpaa suut nammineerluni aqqutit atussanerlugit. Nammineerluni Kalaallit Nunaanni ingerlarusuttoqarpoq, taamaattumillu aallartisaanissaq ajornakusoorsinnaalluni, Mikå Mered Politikenimut oqarpoq.
Benny Engelbrecht, S-ip inuussutissarsiorneq pillugu oqaaseqartartoq oqarpoq, Namminersornermut Inatsip toqqammaviata nunanit allanit suliffissanik aallartitsiniartunit ajornakusoornerusumik ingerlasoqarsinnaasoq oqaaseqarfigaa.
- Inuiaqatigiilli malinnaatinneqarnerunissaat taamaalilluni anguneqarsinnaavoq, Benny Engelbrecht oqarpoq.
Inuussutissarsiornermut Ineriartornermullu ministeri Henrik Sass Larsenip qularnaarpaa ajornartorsiut aaqqinneqartariaqartoq.
- Danmarki Kalaallit Nunaallu ataatsimoortumik ajornartorsiummik qanoq Namminersornermut Inatsit iluaqutigalugu ajornannginnerusumik suliffissanik aallartitsisoqarsinnaanera pillugu periarfissanik suliniutissanik gruppimik sanasoqarnikuuvoq, ministeri Politikenimut oqarpoq.