Issittumi angallassisutut allagartartaartitsinerit

Ataasinngorpat issittumi angallassisartunngorniat qulit Campus Kujallermi Qaqortumiittumi ilinniakkatik naammassissavaat.

Ukiut tallimat ingerlanerini ilinniakkamut naammassinnissimasut 72-iupput.

- Ilinniartut Kalaalit Nunaata sineriaani tamaneersuupput. Anguniagaraarput siunissami kalaallit angallassisutut ilinniarsimasut Kalaallit Nunaanni iloqarfiini tamaginni peqalernissaa, anguniagarpulli ukiut tamaasa qanilliartortarparput, Campus Kujalleq tusagassiuutinut nalunaarummi allappoq.

Tamanna angussagutsigut ilinniartut atuartinneqarnerisa nalaani Kalaallit nunaata oqaluttuassartaa, piorsarsimassuseq, geologi uumasusilerinermut kiisalu kulturimik paasinnittariaaseq annertuumik piumasaaqatitalimmik misilitsinnerpassuartalik ilinniartut ingerlassimavaat.

Angalanerit arlallit

- Aammattaaq angallatarineqartut toqqissisimanarnerpaamik angallanneqarnissaat naammassineqarsinnaaqqullugu VHF-mik issittumilu ikiueqqaarnermik pikkorissartinneqarput. Tamanna Qaqortumi, Narsarmi, Igalikumi kiisalu Qaqortukuluumi arlaleriarluta misileraatitsinikkut ingerlassimavarput. Taassumalu saniatigut ukioq manna ilinniartut Nuummut, Aasiannut Ilulissanullu ilinniartut angalaqatigiittarsimasut, Campus Kujalleq paasissutissiivoq.

Ilinniakkamik naammassinnittussat atii:

Louisa Høyer, Julia Josefsen, Karen Olsen, Kristian-Peter Noahsen, Maria Heilmann, Steve Sandgreen, Wilhelm Phipps, Dagmar Mørch Dalager, Mariane Petersen, Suuluaraq Motzfeldt.

Aggustip qaammataani holdip aappaa Campus Kujalliup Adventure Guidetut ilinniakkamik aallartissapput. Tassani asimi angallassineq, angallammik annerpaamik aqqaneq marlunnik ilaasoqarluni angallassisinnaaneq, ikioqqaarneq annertuneq (WFR) allarpassuillu immikkut sammineqassapput. Taakku aallartittussat decembarip ulluisa 15-ni naammassissapput.