Issittoq: Silap pissusia pillugu ilisimatusarnermut millionilikkaanik aningaasaliineq

Danskit silap pissusianut tunngasunut ministeriata Lars Chr. Lilleholtip Issittumi ungasissumut isigaluni ilisimatuussutsikkut suliniutit 18,6 millionit koruuninik tapersiiffiginiarpai. Sermersuaq, Golfstrømmi aamma Issittumi pinngortitap ataqatigiinneri ukkatarineqassapput.

Wieter Boone

Aaqqissuisoqarfik

sisamanng 12. apr 2018 09:24

Annonse

Nunarsuaq tamaat ataatsimut isigalugu kissatsikkiartorneranit, Issittup 1980-ikkunili kissatsikkiartornera marloriaammik sukkanermik pilersimavoq. Tamatuma aput, sermeq aamma Issittumi inuuniarnikkut atukkat kisiisa sunniiffiginngilai, kisianni aamma nunatsinni sermersuup aakkiartornerani nunarsuup sinneranut immap qaffakkiartorneratigut kinguneqartitsivoq, Golfstrømmimilu aamma allannguisinnaasut, Klimaministeriet tusagassiuutinut nalunaarummi allappoq.

Silap pissusiata allanngoriartornera

Issittumi silap pissusianut tapiissutit Energi-, Forsynings- og Klimaministerietimit aqunneqartup, 2018-imi aningaasaliinermi piffissaq ungasissumut isigaluni misissuinerit nanginnissaannik salliutitsivoq, tamatuma silap pissusiata allanngoriartornerata ineriartornera kingunerilu erseqqissarsinnaavai.

Uku tapiiffigineqarput

- Greenland Ecosystem Monitoring (GEM), Kalaallit Nunaanni pinngortitap ataqatigiissusaanik misissuillunilu malinnaasoq

- Programme for Monitoring of the Greenland Ice Sheet, Sermersuup aakkiartorneranik alapernaarsuisut

- Faroe Monitoring (FARMON), Savalimmiut eqqaatigut sarfakkut erngup, taratsup aamma kissartup ingerlaarnerinik misissuisut

- Issittup silap pissusiata allanngoriartornera sukkasuumik pivoq. Allanngoriartornerisa kingunerisalu Issittumi tamatumalu avataani malinnaaffigeqqissaarnissaa pingaaruteqarpoq. Kalaallit Nunaanni aamma Savalimmiuni silap pissusia pillugu ilisimasanik nutaanik ineriartortitsinermut tapeeqataasinnaanera klimaministeritut nuannaarutigaara, Lars Chr. Lilleholt oqarpoq.

inuiagatigiit silap pissusaa avatangiisillu