Greenpeace
Issittoq pillugu sikkilertut
Greenpeace arfininngornermi nunarsuaq tamakkerlugu akerliussutsimik takutitsinermik aaqqissuussimmat Københavnimi 400-t peqataapput, tamatumanilu Issittup illersorneqarnissaa oqariartuutigineqarluni
Nunarsuaq tamakkerlugu inuit tuusintit arlallit arfininngornermi akerliussutsimik takutitsipput. Greenpeace nunani 33-ni sikkilerluni akerliussutsimik takutitsinernik 'Ice rides'-inik 160-inik aaqqissuussivoq. Københavnimi akerliussutsimik takutitseqataasut 400-t missaanniipput, taakkunanngalu Issittumi uuliasiorluni qillerisoqannginnissaa aalisapiluttoqannginnissaalu piumasarineqarluni. Taamatuttaaq Qalasersuup eqqaata nunarsuarmi eqqissisimatitanngortinneqarnissaa piumasarineqarpoq.
Greenpeacemi Issittumut tunngasuni akisussaasoq Jon Burgwald nunarsuaq tamakkerlugu akerliussutsimik takutitsinerup pinissaa pillugu ilungersorluni sulissuteqarsimavoq.
- Issittumi susoqarnera ullumikkut inunnit ukiualuit matuma siornamut sanilliullugu eqqumaffigineqarneruvoq. Inuit nunarsuaq tamakkerlugu taama amerlatigisut peqataanerat ataatsimut isigalugu alutornartuuvoq. Tamanna Issittup illersorneqarnissaa pillugu inuit 6 millionit atsiorsimanerat ilanngukkaanni inuit Issitttumik asseqanngitsutut minnerpaamik isiginninnialersimanerannut takussutissaavoq, Jon Burgwald Sermitsiaq.AG-mut oqarpoq.
Atuaruk: Iissittup illersorneqarnissaanik piumasaqarlutik 6 millionit atsiorput
Nunarsuarmi aqutsisunut oqariartuut
Greenpeace nunarsuaq tamakkerlugu akerliussutsimik takutitsinerit aqqutigalugit nunarsuarmi aqutsisunut Issittup illersorneqarnissaanik oqariartuuteqarusuppoq. Greenpeacep Issittumut tunngasuni akisussaasuata nunanut allanut ministeri Martin Lidegaard tallimanngornermi ataatsimeeqatigaa oqariartuutiminnillu erseqqissaassuteqarfigalugu.
- Danmark nunaarannguuvoq, Issittumulli akisussaanerput sunniuteqarnerpullu annertulluni. Issittumi naalagaaffiuvugut, naalagaaffeqatigiinnerlu kiisalu Issittumi Siunnersuisoqatigiinnut ilaasortaanerput aqqutigalugit nunarsuup immikkoortortaani tamaani piujuartitsinissaq tunngavigalugu ineriartornermut peqataanissamut periarfissaqarluarluta. Nunanut angisuunut naalakattaaginnarsinnaanngilagut imaluunniit soqutiginninngitsuusaaginnarsinnaanata. Tamatta inuttut ataasiakkaatut nunatullu susassaqarfigaarput, Jon Burgwald oqarpoq.
Atuaruk (qallunaatut): Greenpeace aktionerer i Legoland
- Danmarkip mingutsitsinnginnissamik anguniagaqarnini amerlanertigut pissusissamisoortumik usorsisimaarutigisarpaa. Kisianni tamanna oqaluinnarnerorpasittarpoq uuliasioqatigiiffissuit Issittup imartaani sikorasaartumi qillerinissamut siulliuniunneranni naalakkersuisut assatik sarlissiutiinnarlugit issiaannartarmata, Burgwald uparuaavoq.