Arctic Circle 2014

Issittoq pillugu pingaarutilinnik ilisimasallit Reykjavikimi katersuupput

– Naalakkersuisut aallartitarpassuisa Issittormiut pissutigalugit ataatsimeersuarnermit nunaminnut angerlarunik ilisimasat piviusumut iliuusinngortittariaqarpaat, Johan Lund Olsen oqarpoq

Arctic Circle 2014, Johan Lund Olsen, Inuit Ataqatigiit, senator for Alaska, Lisa Murkowski
Folketingimut ilaasortaq Johan Lund Olsen, Inuit Ataqatigiit aamma Alaskap senatoria Lisa Murkowski Arctic Circle 2014-imi Islandimi Reykjavikimi ingerlanneqartumi peqataapput.

Ulluni makkunani ataatsimeersuarneq Arctic Circle ukiut aappassaanik tulleriisillugu Islandimi Reykjavikimi ingerlanneqarpoq. Nunanit 40-t sinnilinnit peqataasut 1400-t sinnillit Islandimiipput, tassani politikerit, ilinniagaqrtut, inuinnaat kattuffiisa suliffissuaqarfiillu Issittumi ineriartorneq oqaluuseralugu. Nunatsinnit peqataapput Folketingimut ilaasortaq Johan Lund Olsen, Inuit Ataqatigii, tamatuma saniatigut Kuupik Kleist, Arctic Circlep siulersuisuini ilaasortaq, Josef Tuusi Motzfeldt kiisalu Inuuteq Holm Olsen, Kalaallit Nunaata Washington DC-mi sinniisoqarfiata pisortaa.

Arctic Circlemit asserpassuit takukkit.

– Arctic Circlemi siullermeersumik peqataavunga, oqartariaqarpungalu ilimagisakka tamarmik naammassineqartut. Matumani attavinnik nutaanik pilersitsisoqartarpoq, inuppassuillu sunniuteqarluartut ilisimasallillu aammalu politikereqatikka issittumut apeqqutit pillugit oqaloqatigaakka. Nunat taama amerlatigisut ilisimatuullu taama amerlatigisut peqataammata ilisimasat, ataatsimeersuarnermi taamaattumi pissarsiat nalissaqanngillat, tamatumalu aamma takutippaa amerlaqisugut Issittoq nunarsuullu ilaani nillernerpaami mersernarnerpaamilu inuusut 4 millionit missaanniittut pillugit ernumassuteqartugut. Taamaattumik kissaatiginerpaavara ilisimasarpassuit tamakkua uagutsinnut, issittormiunut, iluaqutaajumaartut. Naalakkersuisut aallartitarpassuisa Issittormiut pissutigalugit ataatsimeersuarnermit nunaminnut angerlarunik ilisimasat piviusumut iliuusinngortittariaqarpaat, IA-mit tusagassiorfinnut nalunaarut malillugu Islandimi ataatsimeersuarneq pillugu Johan Lund Olsen (IA) oqarpoq.

Ataatsimeersuarnermi Johan Lund Olsenip Issittumi politikereqatini arlallit naapittarpai, ilaatigut Alaskami senatori Lisa Murkowski, Johan Lund Olsenitut Komiteen for Arktiske Parlamentarikere-mi ilaasortaq.

Johan Lund Olsenip Lisa Murkowski-llu ilaatigut oqaluuseraat Kalaallit Nunaanni Alaskamilu ineriartorneq kiisalu USA-p Issittumi Siunnersuisoqatigiinni siulittaasunngornissaa.

Nunatsinnit aamma peqataavoq Inatsisartut siulittaasorisimasaat Josef Motzfeldt, taannalu nunat avanarliit killiit suleqatigiinnerat pillugu oqallinnermi peqataavoq, taamatuttaarlu peqataavoq Naalakkersuisut siulittaasorisimasaat Kuupik Kleist, Arctic Circle-mik suliniuteqaqataasutut siulersuisunullu ilaasortatut, tusagassiorfinnut nalunaarummi allassimavoq.

Powered by Labrador CMS