Issittoq pillugu isumalioqatigiissitami nutaami Aleqa ilaasortaassaaq

Siumumit folketingimi ilaasortaq, Aleqa Hammond, uani sapaatip-akunnerani issittoq pillugu isumalioqatigiissitami, Polar Research and Policy Initiative (PRPI), pilersinneqartussami ilaasortaassaaq. Siumut Folketingimi ilisimatitsivoq.

Namminersortoq
PRPI tassaavoq nunarsuarmi issittumut sikuiuitsumullu tunngasunut isumalioqatigiiffik Londonimiittoq. PRPI namminersortuuvoq politikkikkullu arlaannaanut attuumassuteqarani.

Aleqa Hammond isumalioqatigiissitap taassuma siulersorneqarneranut peqataassaaq.

Paasinninneq
Tuluit Nunaanni naalagaaffiillu suleqatigiit akornanni issittoq pillugu annertunerusumik ilisimasaqarnerulernissaq pissutsinullu immikkuullarissunut paasinninnissaq, Siumut Folketingimi ilisimatitsivoq.

Aamma Tuluit Nunaata naalagaaffiillu suleqatigiit issittumi annertunerusumik ilisimatusarnikkut, kulturikkut, politikkikkut niuernikkullu peqataanerulernissaat siunertaavoq, aamma PRPI-p issittumi inuiaqatigiit politikkikkut isumaginninnikkullu unammilligassaat sammineqartassapput, minnerunngitsumik avatangiisinut tunngasut.

Ataqqinartumik ingerlatsiviusoq
Issittumi inuit angerlarsimaffeqarput Isumalioqatigiisitallu sulinermini aallaavigissavaa issittoq ataqqinartumik ingerlatsiviusoq. Nunap inuisa peqataatinneqarlutik isumaat, ilisimasaat, suleqatigineqarnissaallu isumalioqatigiisitap sulinerani pingaanerpaatut toqqammaviussapput.

Isumalioqatigiissitaq Londonimi sisamanngorpat februarip 18-ani pilersinneqassaaq.

Isumalioqatigiisitamut PRPI-mut aamma ilaasortaassapput tuluit parlamentianni ilaasiortat sisamat, Harvardimi lektori, aamma Falkland Islandsimut governoriusimasoq.

Atuaruk: Aleqa Hammond: Takkuppunga