Issittoq aakkiartortoq inuusuttut ilisimasaqarfiginerulissavaat

Ilinniagaqartut nunarsuarmit tamarmeersut maannakkorpiaq Nunatsinnukaapput, ukiumoortumik On Ice-ekspeditionip ilaatut, tamatumuuna Issittumi kulturi, pinngortitaq uumassuseqarnerlu ilisimasaqarfigilissallugit.
Canadami ullut marlussuit Ottawa-meereerlutik inuusuttut ilinniagaqartut ullumi Kangerlussuarmut tikissapput, tassanngaanniillu umiarsuarmik Nunatta avannaatigoorlutik Canadamukassallutik. (Angalanermi programmi tamaat takuuk uani)
Aamma atuaruk: WWF issittumut paasisassarsioqatigiuk
WWF Verdensnaturfonden Students On Ice-mi suleqataavoq, WWF-illu ilaatigut kalaallip ilinniagaqartup peqataanera aningaasalerpaa.
Taanna tassaavoq Maria Suersaq, Qaanaameersoq, Qaanaarlu sumiiffimmut ilaavoq, WWF-p taasaanut Sermeq kingulleq/Last Ice Area.
Maannakkorpiaq Maria Suersaq Aasianni najugaqarpoq tassani GU-mi ilinniarluni, aasaaneranilu atuanngiffeqarnerup kingorna 2.g-mi aallartissalluni - angalanissarlu qilanaaraa.
– Paasitinneqarama aallassallunga nuannaaqaanga. Taamaattumik qilanaartorujussuuvunga. Ilikkagaqarluarnissara, ikinnguterpassuartaarnissara nuannisarnissaralu qilanaaraakka, taanna oqarpoq.
Ilinniagaqartut allat taamaanngitsut Maria Suersap Issittoq ilisimasaqarfigisorujussooreerpaa, tassami Kalaallit Nunaanni najugaqarami, nunanili nutaamit isigalugu takunissaa qilanaaraa - Nunavummullu, angalanerup naaffissaanut, sanilliussinnaassallugu.
– Kulturit assigiinngitsut pinngortitarlu soqutigisorujussuuvakka, taamaattumik Kalaallit Nunaata Nunavullu assigiinngissutaat takorusuppakka, taanna oqarpoq.
Tamanna peqatigalugu Issittumi ineriartorneq ernumanartoqartippaa, silap pissusiata allanngoriartorneratigut immap sikua sermersuarlu aakkiartormata.
WWF Verdensnaturfondimi Kalaallit Nunaannut suleqataasup Mette Frostip angalaneq isigaa Issittumik, aammalu silap pissusiata allanngoriartornera Issittumi inunnut, pinngortitamut uumasunullu qanoq sunniuteqarneranik ilisimasaqarnerup siammarsarnissaanut periarfissatut pitsaasutut.
– Amerlaqaat Issittumik ilisimasaqarpallaanngitsut, tamannalu Students On Ice-mik angalanerup allanngortitseqataaffigisinnaavaa. Ilinniagaqartut nunarsuarmit tamarmeersut nunaqarfiit avinngarusimasut tikeraarunikkit, Kalaallit Nunaanni inuusuttut naapikkunikkit Issittorlu qanimut takugunikku angerlarunik tamakkuninnga ilisimasanik siammarsaaqataasinnaapput, taanna oqarpoq.
– Taamaasilluni inuit immaqa paasisinnaalissavaat ukiuni makkunani Issittumi allannguutit qanoq annertutiginersut. Immaqalu nunarsuup kiatsikkiartornera unitsinniarlugu inuit namminneq iliuuseqartissinnaalissavagut, tamannami pissuteqarluinnarmat nunarsuup kitaamiuisa avatangiisinik mingutsitsinersuannik.
Ilinniagaqartut saniatigut angalanermi peqataapput ilisimatuut, eqqumiitsuliortut, nassaarniartartut, ilinniartitsisut aamma nunap inuiisa pisinnaatitaaffiinik sorsuutiginnittut nuimasuut, aqqutaani inuusuttunik isumassarsiortitsisinnaasut.
Ilinniagaqartut katillugit 85-it peqataassapput.
Angalaneq naassaaq juulip 28-anni.
Assit amerlanerusut takusinnaavatit uani