Inatsisartut ataatsimiittarfiat

Isornartorsiut paatsuuinermik aallaavilik

Inatsisartut siulittaasuat Lars-Emil Johansen isumaqanngilaq suliat suliarineqartarneranni inatsit unioqqutinneqarsimanngitsoq

Lars-Emil Johansen, formand for Inatsisartut
Lars-Emil Johansen isornartorsiunemut akivoq: – 2013-imi novembarimili Inatsisartuni amerlanerussuteqarluartut aalajangerpaat maanna illutat inikippallaarlutillu ullutsinnut naleqqukkunnaarnerat pissutigalugu inatsisartoqarfimmik nutaamik sanaartortoqassasoq. Aalajangigaq tamanna pisarnertut tamanut soorunami saqqummiunneqarpoq aammalu uani nassaarineqarsinnaalluni http://www.ina.gl/em2013.aspx. Aviisit tamanna pillugu aamma allaaserisaqarput.

Sisamanngornermi KNR-imi unnukkut radioaviisimi Aqqaluup Aneerasaartarfiata inatsisartoqarfimmik inissiivissatut paasititsiniutigineqarnera Ilisimatusarfimmi inuiaqatigiit pillugit immikkut ilisimatusarfimmi pisortamit Maria Ackrénimit isornartorsiorneqarpoq. Isornartorsiuinerli paatsuuinermik annertuumik aallaaveqarpoq.

Maria Ackrénip isornartorsiuinera KNR-p nittartakkaminut ilisimavaa.

Lars-Emil Johansenil isornartorsiummut akissuteqarpoq tusagassiorfinnullu nalunaarutikkut allalluni:

"Maria Ackrén oqarpoq suliaq pillugu Inatsisartut innuttaasunut tusarniaasimasinnaagaluartut. Tamannali Inatsisartut suliassarinngilaat, tassami illu sumi sananeqassanersoq nunatsinni Inatsisartunit aalajangerneqarnani Kommuneqarfik Sermersuumi kommunalbestyrelsimit aalajangerneqartussaammat. Aammami kommuni innuttaasunik taasisitsinermigut maannakkorpiaq tusarniaanermik ingerlataqarpoq. Inissiiffissaq siulittaasoqarfimmit pitsaanerpaatut isigineqartoq, taamaattumillu kommunimut qinnutigineqartoq pillugu paasissutissiinissaq toqqarparput.

Maria Ackrén aamma oqarpoq Inatsisartut pilersaarut pillugu siusinnerusukkut innuttaasunut paasissutissiisimasinnaagaluartut, 2013-imi novembarimili Inatsisartuni amerlanerussuteqarluartut aalajangerpaat maanna illutat inikippallaarlutillu ullutsinnut naleqqukkunnaarnerat pissutigalugu inatsisartoqarfimmik nutaamik sanaartortoqassasoq. Aalajangigaq tamanna pisarnertut tamanut soorunami saqqummiunneqarpoq aammalu uani nassaarineqarsinnaalluni http://www.ina.gl/em2013.aspx. Aviisit tamanna pillugu aamma allaaserisaqarput.

Ilisimatusarfimmi immikkoortortami pisortaq isumaqarpoq illup innissiffissaa Inatsisartunut siunnersuutigineqarsimassagaluartoq, taamaalilluni partiit tamarmik tamanna oqallisigisinnaaniassammassuk. Tamanna isumaqarsimanavianngikkaluarpoq, tassami Inatsisartut pinnatik kommunalbestyrelsili inissiiffissaq pillugu aalajangiisussaammata. Aammattaaq Maria Ackrénip qularaa Inatsisartut Siulittaasoqarfiannit quppersakkamik paasissutissiissutinik imalimmik saqqummiussisoqarnera pisortat ingerlatsinerat pillugu inatsimmik unioqqutitsinerunnginnersoq. Tassunga atatillugu oqaatigineqassaaq pisortat ingerlatsinerat pillugu inatsit Danmarkimi forvaltningslovimik taaguutilik Kalaallit Nunaannut atuutinngilluinnarmat. Akerlianik nunatsinni pisortat ingerlatsineranni suliassat suliarineqartarnerat pillugu inatsiseqarpoq. Inatsisartut sanaartornissamut akuersissummik allat tamaasa assigalugit qinnuteqarsinnaanermut inatsimmit tassannga mattunneqanngilluinnarput.

Sisamanngormat unnukkut radioaviisimi ilanngussami aamma tassani Inatsisartunut ilaasortaq Naaja Nathanielsen innuttaasut sunnerniarlugit 3 millioner kr.-it atorneqarsimanerat ugguaralugu oqarpoq. Aamma taamaattoqanngilaq. 3 million kr.-it taakku tassaapput suliniutip tamarmiusup pilersaarusiornissaanut, tassunga ilanngullugu paasisitsiniaanermi atortussanut, pisariaqartitsinermik misissueqqissaarnermut, sanaartorfissatut ilimanaatilinnik misissueqqaarnernut neqerooruteqartitsinernullu aammalu allarpassuarnut atugassatut aningaasanut inatsimmi akuersissutigineqareersut.

Kiisalu Lars-Emil Johansen siulittaasutut ” taamaattunik siunnersuuteqarsinnaanera” Maria Ackrénip nalornissutigaa. Tassunga atatillugu oqaatigineqassaaq tamanna Inatsisartut siulittaasoqarfiata suleriaasiani § 7, imm. 1-imut naapertuulluinnarmat, tassani allassimammat siulittaasup qularnaarniagassarigaa siulittaasoqarfiup sulinerata sapinngisamik siuarsarneqartarnissaa. Naggataatigut oqaatigisinnaavara Aqqaluup Aneerasaartarfia pillugu qinnuteqaat akisussaaffigalugu siulittaasoqarfiup tamarmiusup ullumi uppernarsarmagu", Inatsisartut siulittaasuat allappoq.

Powered by Labrador CMS